阿滕含春翹新歡香閨任上

多番成為愛情犧牲者的滕麗名，最近搭上圈外中年新歡，二人邂逅約半年已打得火熱，除了連體到超市掃貨外，男方更持有其香閨鑰匙，隨時自出自入，關係親密！

現年35歲的無綫藝人滕麗名，多年來情路坎坷，先後與魏駿傑拍拖9年及與郭政鴻拖拉3年，惜兩男最後都搭上新歡並生兒育女。慘變「剩女」的阿滕最近終再開齋，與一名年約40餘歲的圈外男蜜運，對方更有其香閨鑰匙自出自入，發展迅速！

日前阿滕與中男孖住到尖沙咀一間超市Shopping，期間男方Gentleman地推車及拎袋，而阿滕則十足小鳥依人般翹實他，笑意盈盈。二人主力在凍櫃前揀食材，似乎想買牛扒及鵝肝返歸煮飯仔，但阿滕被途人認出後，即愕然地火速彈開！雖然二人發展僅約半年，但已愛得如膠似漆，記者日前在阿滕的西貢寓所外發現其座駕，但司機並非她，而是該名中男，對方更持有鑰匙直入阿滕香閨，而且極為熟路，可見雙方關係極親密！

肉緊護航：唔好嚇親佢

記者昨日致電阿滕求證，她雖然風騷狂笑，但只肯以「朋友甲」形容新歡：「去超市係因為去朋友屋企煮餸食飯，搵人幫手拎嘢！（你翹住佢隻手？）係我唔好，我男女都翹o架！」問到為何對方駕駛其座駕及持有香閨鑰匙，她說：「我返咗內地，架車又壞咗，佢幫我攞車，冇理由將車匙放喺信箱，所以叫佢拎埋入屋囉！」言談間，她極力維護小愛苗：「唔好嚇親佢！圈中人好難識圈外正常人，咁樣嚇走佢就好難有發展！（富二代？）唔係，係普通香港人。」

對於阿滕有新歡，舊愛郭政鴻表示不知情，並顯得十分好奇，但仍大方送祝福，他說：「我衷心祝福阿滕永遠都咁幸福同快樂！（想佢快啲結婚？）要問番佢，我梗想佢幸福！」

文：影視組、追蹤組