Niki趕劇瞓得少谷唔肥

周麗淇最近拍劇拍到天昏地暗，由於睡眠不足，即使不停「萬歲」請食飯亦食極唔肥，不過，她與林保怡口徑一致地力撐樂易玲好人，極有誠意合作。

周麗淇（Niki）昨日性感出席《b+ab迪士尼飛躍系列》活動，問到有否托胸，她說：「托唔到。（缽仔糕？）加唔到！」當被取笑有睇頭，她即笑說：「正常女仔都有少少嘢睇。」她透露最近忙於拍民初劇，預計復活節前煞科，問到拍劇期間不用花費是否慳唔少？她說：「唔係，我會請劇組食飯。（但你冇肥？）唔夠瞓爭少少，每日瞓得4、5個鐘，但早有心理準備 。（無綫有冇同你計到盡？）樂小姐（樂易玲）好好，係佢同我傾。（改口叫樂大媽？）都係叫樂小姐！」記者問到有否與好友范姜聯絡，她表示雙方曾通電：「佢心情應該冇嘢，我不時同B哥（鍾鎮濤）及范姜佢哋成班人食飯。（受困擾？）唔會。」

同場的模陳嘉寶則透露最近忙於學校功課，更找來師妹Leanne（何思諺）幫手，她說：「我要拍傳記，跟住佢拍低佢每日做乜，係我首次做導演，連剪片同後期製作都一手包辦。」而何思諺則表示將首次演出舞台劇，打算邀請家人捧場。

林保怡：人工加得幾多吖

至於將約滿無綫的林保怡，昨日錄影無綫節目《新派煮意》時表示，日前與樂易玲及梁家樹飯敍：「樂小姐好有誠意，梁家樹又搵我拍劇集《樂府藏龍》同《健康奇案錄》第二輯，我仲考慮緊。」問到會否要求加人工，他說：「人工加得幾多吖！演員最緊要係有好角色，其實內地都有人搵我，佢哋嘅劇本好詳細，所以想留番啲空間。」對於陳鍵鋒及陶大宇嫌無綫人工低，他出言力撐公司：「咁多怨氣？我就好好運，演員唔應該睇錢太重！」至於馬德鐘太太不滿丈夫拍劇辛苦，保怡說：「明知o架喎！食得鹹魚抵得渴！」

文：名人組、影視組