傳遭無綫封殺 陳鍵鋒愕然揼心

最近有傳陳鍵鋒與無綫交惡，昨日更有讀者報料指導火線是他在新劇中由主角變配角，無綫亦暗地裏封殺他！

陳鍵鋒約滿無綫後，最近在有線節目中狂數無綫不是！昨日有讀者報料指他在劇集《洪武三十二》中由主角變配角，無綫除了刪減他在《洪》劇的戲份外，更將他「叮」出《華麗明星賽》及《正識第一》！陳鍵鋒昨日返將軍澳電視城接受《今日VIP》訪問，對於遭無綫封殺傳聞，他說：「我就唔信，咁大間公司唔會咁都容納唔到！要封殺都一早封殺啦！依家先話封殺太搞笑喇！」

有指陳鍵鋒早前推掉7位數字酬勞的內地劇而接拍《洪》劇，事後貨不對辦令他大感不值，問到可有後悔？他說：「依家的確有啲猶豫，但唔可以話後悔，不過有得再揀過會揀拍內地劇！我睇到《洪》劇嘅海報都有啲愕然，以為自己企中間，點知喺第3、4排，同最初講嘅有出入，係有啲失望！」他坦言現時選擇工作會多方面考慮，不會以電視台為首選。

不滿海報排位

至於無綫外事部副總監曾醒明強調，絕無封殺陳鍵鋒，雙方雖然約滿，但仍保持緊密的良好關係：「陳鍵鋒稍後會宣傳佢主演嘅外購劇《美人心計》。」又否認刪減陳鍵鋒在《洪》劇的戲份，聲言只是誤傳。