墾丁音樂節 Eason嘆無緣(目及)辣妹

陳奕迅日前於台灣參與音樂活動時，大嘆無緣欣賞比堅尼辣妹，對於有指當地沙灘有年輕人濫藥，他笑說：「我都有食感冒藥！」

陳奕迅（Eason）日前首度參與墾丁春浪音樂節，帶病上陣的他被現場氣氛感染，演出時心情High爆，跟大家打成一片：「春浪好好玩，吹住海風唱歌，勁爽！啲觀眾又High，好想下一年再嚟玩過！」每年春浪最令人注目是沙灘上的比堅尼辣妹，不過他慨嘆無緣欣賞：「嗰晚得十幾度，着比堅尼唔凍病先怪啦！我真係一個都見唔到，就連個沙灘都係架車經過時，望過幾眼咋！」

對於台灣傳媒指有人於附近的沙灘濫藥及「打野戰」，Eason即大搞爛Gag笑說：「我都有食藥呀！不過係感冒藥！我坐私人飛機去高雄，冇乜時間玩，我諗唔會有人濫藥啩？睇騷啲觀眾都好正常健康，希望大家聽歌去放鬆，唔好做啲傷害身體嘅事啦！」

奶茶搵啱對象

另外，Eason昨日飛到北京出席英皇電影發行的新片《隱婚男女》發布會，與劉若英（奶茶）、白冰、庾澄慶及導演葉念琛齊齊谷戲，Eason不忘向兩位女星大獻殷勤，先向奶茶下跪，又幫白冰揼骨，相當搞笑！而感情事一向低調的奶茶，竟自爆已搵啱另一半：「結婚將會保密，婚禮亦絕不對外開放！」