一鑊翹起新劇 陳豪賣咖啡辭演得罪監製

陳豪追尋夢想開咖啡店做老闆，更因此而辭演新劇，此事引起監製張乾文不滿，並向他連珠炮發。

陳豪辭演的新劇《樂府藏龍》有胡杏兒、歐陽震華及鍾嘉欣等參演，有指陳豪早於去年11月已簽約接拍該劇，並鐵定5月正式開鏡，但陳豪上月1日才向公司表示要到馬來西亞開設咖啡店，並以要在當地坐鎮「看舖」數個月為由辭演，令劇組陣腳大亂，亦引起監製張乾文不滿。據知，監製現有意找敖嘉年執二攤頂上，但始終擔心他不能孭重飛，故改寫劇本，加重歐陽震華的戲份。

樂易玲好無奈

張乾文接受訪問時承認此事：「我聽到個理由都好愕然。（接受理由？）我唔評論，但邊個接受就邊個負責。其他人聽到個理由都覺得唔合理啦！一間咁講制度嘅公司都冇表示，我冇嘢好講亦冇辦法，角色唔係話冇咗陳豪唔得！（有影響？）啲戲服全部改過晒！（敖嘉年頂上？）有咁考慮。」高層樂易玲亦承認陳豪辭演：「我知佢間咖啡店因為遲咗交吉先同個劇撞期。事件一定有人會唔開心，我都有勸陳豪，但係人人都知咖啡對佢嚟講係命同夢想，重要過女人。（難為咗你？）係，好無奈，但佢唔係作理由，唔係講大話。」

記者聯絡上當事人陳豪，他對於辭演感到遺憾：「我知監製唔開心，都盡量同高層解釋。（為咖啡放棄事業？）冇咁誇張，我正職都係演戲，但咖啡又係我小小夢想，但都唔會為咖啡而放棄事業。」