鬧完無綫亮相宣傳 陳鍵鋒回巢拍劇睇錢

早前陳鍵鋒接受有線訪問向無綫作出控訴，昨日他出席無綫古裝新劇《洪武三十二》活動，獲外事部副總監曾醒明傍實一起受訪，加上現場只得他一位演員以時裝亮相，顯得格格不入。問到是否不滿無綫幾十蚊都計較？態度軟化的陳鍵鋒說：「唔係針對咩公司同咩人，只係分享感覺，做個稱職嘅受訪者。」與無綫冇約的他直言自由身令機會增多，但不介意再為無綫拍劇，問到會否要求加人工？他說：「最好佢畀得心甘情願，我又樂意！」而謝天華則表示每次與無綫傾合約都十分順利，並指劇中與不少女藝人有激情戲，更晒命說：「多到唔記得！」

同場的江若琳首次拍古裝劇好緊張，她透露角色有公主病，希望不會嚇走異性：「喺劇中對啲觀音兵好惡，幾乞人憎，我真人唔係咁誇張！」她自爆有追求者等了她幾年，但暫時未能令她心動：「到30歲佢哋仲等緊嘅話，我先考慮啦！我成日周圍飛，好難畀到安全感人。（揀圈中人？）隨緣啦！想試吓一段轟烈嘅愛情！」