陳茵媺生日獻髀陳豪

陳茵媺與「黃金筍盤」陳豪的戀情愈傳愈烈，日前她趁生日前夕化「行」妝並以一身透髀黑衣會愛郎，怎料被記者撞破好事，只好打道回府食自己！雖然生日錯過單對單浪漫時光，但因戀情而曝光率激增的她，覓得筍盤之餘又密密吸金，絕對是大豐收！

現年39歲的陳豪與30歲的陳茵媺（Aimee），傳因合作劇集《心戰》而撻着，陳豪更被指到Aimee的將軍澳清水灣半島香閨過夜！「雙陳戀」傳出不夠一星期，兩位主角已成為全城焦點，雖然他們連日來以一副「冧樣」互讚，但仍同聲同氣否認戀情。

剛於本月1日度過30歲生日的Aimee，事先張揚會在工作中度過，但本報記者卻撞破她於生日前夕漏夜盛裝外出，相信是心急偷會情郎！當日晚上7時許，她以全黑型格打扮步出清水灣半島寓所，穿上長袖皮褸、流蘇短裙及中靴的她，隱約露出白滑大髀，一身狂野Look明顯與平日的鄰家女孩打扮差天共地！

自稱盛裝買嘢飲

當發現記者後，她即露出尷尬表情，並自辯一身「盛裝」打扮只為出街買飲品！記者追問她去哪裏，她渾身不自然地說：「冇呀！聽日仲要開工。（着到咁靚喺屋企開Party？）唔係呀！我日日都着得OK，心情都靚啲嘛！（係咪同陳豪拍拖？）唔係呀！」雖然仍封嘴護愛苗，但談及陳豪時，她不禁一臉甜絲絲，十足沐浴愛河的少女。由於「好事」被撞破，她與記者傾談後便獨自折返，回家「食自己」過生日。而生日當天，她在銅鑼灣出席活動後便返家，再於下午5時許到將軍澳電視城繼續工作。

放口風情侶檔搵錢

「雙陳戀」傳出後，Aimee曝光率激增，頻頻獲邀出席活動，實行將陳豪舊愛廖碧兒的「人」、「財」兩皆接收！昨日，她穿上吊帶背心出席遊戲機活動，然後匆匆趕往澳門登台，工作密麻麻。記者取笑她取代廖碧兒成為「吸金王」，她尷尬地說：「吓！我唔同人比較，係時間配合到啫！（有冇人搵你哋情侶檔？）唔知，要問番經理人，不過同邊個同事都冇所謂。（可以收貴啲喎！）好呀！好呀！（同廖碧兒『情敵檔』呢？）唔好咁講，同任何同事都冇所謂。」問到陳豪本月16日生日當天，她會有何準備，她表示會傳短訊給對方。

廖碧兒VS陳茵媺

廖碧兒
32歲

5呎7吋

35D、25、34

01年《國際華裔小姐》冠軍，曾拍攝電影《我老婆唔夠秤》、劇集《皆大歡喜》、《居家兵團》等及多個廣告。

陳茵媺

30歲

5呎6吋

34C、24、34

06年《香港小姐》冠軍，曾參演劇集《烈火雄心3》、《天天天晴》及《讀心神探》。