張艾嘉心情沉重

鄧光榮猝逝，圈中好友均感到突然、可惜及難過，紛紛向他的家人送上慰問。

張艾嘉：「好突然，心情好沉重，同佢拍過戲，之後好少聯絡，亦唔知佢有心臟病，見佢都好健康同開心，對朋友好有義氣。」

鍾鎮濤於微博上載鄧光榮的舊照，他說：「消息來得太突然了！向我們的好大哥鄧光榮致敬！一路好走！」

曾志偉：「佢身體一向好好，成日做運動，幾個月前仲戒埋酒，咁健康嘅人出事，好愕然。（鄧光榮心臟係咪有事？）唔知。（有傳佢死前一晚上賭船玩通宵喎？）唯一知道情況係去咗佢屋企嘅陳自強，佢都講唔到啲乜嘢，鄧光榮走嘅時候，佢媽媽都在場。（鄧光榮有咩遺願？）都冇乜遺願，佢同我傾偈，提過有咩角色可以搵佢。（金像獎會唔會追頒獎項畀佢？）太突然未開會，若有需要，演藝人協會會提供協助。」

王家衛：「大哥一直係一個好健康、好開朗嘅人，我真係好震驚同難過。佢係我嘅好朋友同老闆，係佢第一個鼓勵同支持我做導演，亦分享好多經驗，好懷念佢，希望佢家人節哀。」

黎瑞恩：「今天晚上心情好起伏，剛跟好友慶祝生日，同日就收到一位我很尊敬的前輩離開我們，我真是難以接受好傷心，真的很傷心，好掛念你呀大哥！家姐、妹妹、大嫂保重！」

林建明：「好難過好可惜，做人真係好難估計，已經託朋友問候佢太太同女。我哋十幾歲相識，佢好靚仔、眼神好迷人、有風度又錫屋企人。大哥睡夢中過身，冇痛苦離開都算係幸福，只係匆忙咗。」

余少寶：「心情好難平復，之前幾日先同佢一齊出席飲宴，我仲揸車接佢，飲完之後佢陪我行咗幾條街攞車，一路上有傾偈，我仲勸佢要休息多啲。原本約咗呢個禮拜打Golf，可惜見唔到面。大哥對媽咪同老婆好好，仲諗住帶佢哋去觀瀾湖玩，叫我介紹邊度有得食農家菜！」