陳鍵鋒轟無綫賤價留人

曾獲無綫力捧的陳鍵鋒去年毅然離巢北上發展,日前受訪時爆背後內幕,指無綫提出不合理的續約條件,簽約十年不加人工,令他心淡。

近年不少無綫一線花旦小生,紛紛離巢北上拍劇,除了有助擴大華語市場,人工亦即時幾級跳!現年32歲的陳鍵鋒去年8月亦加入「北上大軍」,與無綫脫離關係。他日前接受有線節目專訪,道出背後辛酸原因:「完約後同公司傾續約,但為加幾十蚊人工爭辯落去,好唔值得!」他又透露曾考慮做無綫「親生仔」,但因條件苛刻而卻步:「有高層請我傾簽約嘅事,條件上列明簽十年約,但薪金就保持唔變,唔係要計較乜嘢,但有邊個可以保證兩年後有冇人搵我做嘢?到時我點維生?」

訪問期間,陳鍵鋒以廣東話對談,感覺新鮮:「以前要逼住講普通話,出親活動都要左閃右避怕入鏡頭,明明已經係最大台,有咩好怕呢?」提到曾與吳卓羲、黃宗澤及馬國明獲無綫力捧,眼見其他人個個上位,心中不是味兒,他說:「明明努力工作,亦得到觀眾認同,但同輩一個接一個攞獎,自己就只係企埋一邊,連提名都冇份。」他更直言「聽話」是在無綫生存之道:「我就唔識做囉!」

記者就此事向無綫外事部副總監曾醒明求證,他說:「陳鍵鋒確實已經約滿無綫,依家係自由身,同我哋關係依然好好。佢仲答應咗會返嚟幫手宣傳新劇,如果佢真係有意見嘅話,我會去了解一下。」

「冇理由佢犯錯我承擔」

其實除了陳鍵鋒與無綫續約鬧不快外,陶大宇亦曾於傾約時受到無綫不合理要求!他透露當年曾與無綫簽兩年合約,一年拍二十集電視劇,但等了年多才拍攝《掌上明珠》,完約後仍有十集未完成,無綫竟叫他無條件將合約延期半年:「佢話當送畀無綫,我覺得唔合理,冇理由佢犯嘅錯要我承擔。」最後,無綫賠償十集酬金了事,但相隔幾個月後,無綫欲想找他再拍戲,但竟要求他先賠償該十集酬金,才可繼續合作!大宇直言無綫太過分及不能接受,故指近日無綫花旦小生紛紛離巢是人之常情:「藝人亦要養妻活兒!」

專案組

陳鍵鋒受訪時轟無綫提出苛刻續約條件,決定北上發展。

陶大宇