甄子丹關公野史假當真

甄子丹為變身關公壓力爆燈，除了狂食增肥外，又不停上網搵料兼睇漫畫，豈料一度將假歷史當真，結果遭導演嘲弄！

宇宙最強甄子丹在新片《關雲長》中變身「武聖」關公，令他大感壓力，事前做足準備，務求在神態上更有說服力：「坦白講，關公係我最冇信心演繹嘅角色，無論外形同感覺，我都同呢位家傳戶曉嘅歷史人物大相逕庭，所以之前我係咁搵料！」豈料他一度將漫畫書的虛構橋段當真，結果被兩位導演麥兆輝及莊文強取笑，子丹說：「嗰排我係咁上網又刨漫畫書，好似考試咁，比個女讀書仲勤力！後來先知有啲漫畫內容係假，結果畀導演笑！」

除了惡補歷史，子丹為了變得更魁梧，開拍前每日食足5餐增磅，令他未能立即適應：「拍《葉問》就要外形清秀，演陳真就要曬燈同食得清淡啲，等肌肉更加結實，點知拍完又要即刻增肥！」

獲讚即「上身」

麥兆輝及莊文強大爆子丹起初沒有信心演關公，但最終被他們的說話打動，莊文強表示當時跟子丹說：「你根本就係關公，你係全宇宙最好打o架！大家都睇死你改變唔到，依家有個機會畀你，你願唔願意做？」其後子丹即「上晒身」，還獲兩位導演力讚：「佢真係演到有血有肉嘅關雲長！」