嘉玲「峰」騷剪綵 姬摩絲趕住「酒」

影后劉嘉玲與超模姬摩絲昨晚同場競艷，面對身材高挑的英國型模以密實旗袍亮相，嘉玲一招「中門大開」加上滔滔話題，輕易成為全場焦點。

國際超模姬摩絲及影后級人馬劉嘉玲昨晚為法國品牌Longchamp亞洲旗艦店La Maison 8擔任開幕剪綵嘉賓，同場還有馬詩慧、周慧敏、林夏薇、王梓軒、余安安及陳霽平等。37歲的姬摩絲穿上短身旗袍，洋溢中國味道，但包到冚的她風頭被45歲、性感程度爆燈的劉嘉玲蓋過！

姬摩絲全程只亮相10分鐘，未有受訪，不知有祝酒儀式的她更於剪綵後一支箭飆入店舖，要司儀李浩林提點，聽不清楚的她卻三度問：「What？」直至有人遞上香檳她才知道要祝酒，但她拿起香檳又急急腳閃入舖，型到冇嘢講！

讚超模多驚喜

嘉玲身穿Gucci超性感晚裝到場，艷光蓋過姬摩絲。首次碰面，嘉玲謙稱：「冇諗過同佢比。（太性感危險？）設計好嘅衫唔會（易走光）。」談到姬摩絲着旗袍相，嘉玲大讚：「好Surprised，佢每次都畀人Surprise，好鍾意佢，想見佢好耐。」果然識英雄重英雄！

談到提名香港金像獎影后，嘉玲表示以平常心面對：「我攞自己高興，人哋攞戥人高興，無論攞唔攞到都唔影響對做戲嘅熱愛。」她透露老公梁朝偉於北京趕戲，應該未能陪她出席頒獎禮，又透露正密鑼緊鼓揀戰衣。至於會否再拍戲，她說：「有好角色同劇本會拍，依家唔係主要拍戲，最想好好生活。（日本地震有感而發？）有影響，整個地球變得好快，災難一次大過一次，想好好珍惜生活。（出席周五嘅賑災騷？）唔會，我已經用另一個途徑賑災。」

排緊隊等生BB

嘉玲感慨在圈中已經30年，再次強調想「好好生活」，問到地震會否影響她的生育計劃，她說：「唔會，不過所有嘢想細緻啲去睇，之前好急，依家想淡定啲、睇多啲嘢。（生BB？）生仔依然會進行，但係排緊隊，望天打卦！」

此外，前晚姬摩絲與好友鄧永鏘等人飯敍後返文華東方酒店，酒店職員充當保鏢築起人鏈「護駕」，期間一名女職員不慎跌倒。