Chilam為靚等足十年

入行20年的張智霖，前晚舉行處男紅館騷，發表「冧妻宣言」冧爆袁詠儀！他說沒後悔公開戀情，不介意因拍拖遲了10年才在紅館開騷，令靚靚感動到眼濕濕！

在娛樂圈打滾20年的張智霖（Chilam），前晚獻出處男紅館個唱，吸引不少圈中人捧場，全場爆滿！靚靚身為Chilam背後的女人，全情投入！Chilam在台上分享浪漫戀愛史，並借機向靚靚發表「愛的宣言」，娓娓道出二人由拍拖、結婚到生仔的人生重要歷程，他哽咽說：「當時好多朋友反對我公開戀情，覺得會斷咗一個偶像歌手嘅財路！如果冇公開嘅話，呢個演唱會可能會早10年發生……不過唔緊要，我冇後悔過，亦多謝你（靚靚）賜我一個家，同埋一個小朋友（囝囝張慕童）畀我！」令人相當感動！

一番感人宣言後，Chilam更憑歌寄意冧爆靚靚，獻唱她主演的電影《新不了情》歌曲，跟着再分別向她及囝囝慕童唱出《骨膠原》及《反斗奇兵》，銀幕則播放Chilam一家的生活照，場面感人，靚靚聽到眼濕濕，身旁的伍詠薇更感動至哭成淚人！對於老公的「冧妻宣言」，靚靚亦透過鏡頭向老公隔空咀嘴，Chilam即搞笑地出手擒吻，肉麻又溫馨！而Chilam與蔡卓妍合唱《現代愛情故事》時，靚靚剛好離座，當他下台握手時，靚靚竟不在座位。

晒肌向哥哥致敬

為配合演唱會的外星人主題，Chilam以多個Cyber造型示人，充滿科幻感，與舞蹈員勁歌熱舞，場面火辣！Chilam更向已故巨星張國榮（哥哥）致敬，以對方的造型及唱腔演繹《想你》，並邊唱邊自摸，最後剝衫騷6舊腹肌：「我只想對呢位歌手講一句：『I Miss You So Much！』」場面感人！