江若琳嘆失傳奇人物

玉婆離世，令不少圈中人嘆息不已，其中白韻琹說：「我梗係玉婆嘅Fans啦！我仲同佢有一面之緣添！記得1974年，我做緊頭等空姐，我未上飛機前，啲同事已經同我講佢好大牌，叫我小心啲服侍佢，唔好得罪佢！佢同老公李察波頓當時坐頭等，我諗佢怕畀人騷擾，所以包晒前後左右啲位，我第一眼見佢，佢就用塊布笠住個頭，叫我千祈唔好騷擾佢，佢乜都唔食，但佢老公就好大食，乜都食一餐。（靚唔靚？）好靚！當年佢係好紅嘅時候，連坐飛機都着得好性感，有四個胸，好大條事業線，仲着老虎紋皮草，當年心諗佢真係老虎乸！（問佢攞簽名同影相？）我邊敢！佢真係好難服侍！一時叫我唔好騷擾佢，一時又叫我攞牛扒食，攞畀佢時佢又唔食，嫌啲牛扒肥，但佢哋臨落機時都同我ByeBye，仲問我係咪中國女仔，因為好少中國女仔個樣咁靚。」她續說：「我都估到佢會死，因為喺米高積遜死時，佢狀態已經唔係咁好，佢頂到咁耐，我都覺得佢好叻。」

另外，謝賢大讚玉婆靚：「睇過佢好多經典電影，佢老咗都仲好靚，影后嘛！（聽到佢死訊好唏噓？）冇得唏噓！我都就快跟住佢去（死），人係咁o架啦！喺咁上下就會去。」而江若琳則說：「佢好多方面嘅發展都好出色，係一個傳奇人物，對佢嘅離世感到好可惜。」余安安亦大表傷感：「So Sad！最深印象係埃及妖后造型，覺得佢愛情和事業都好轟烈，不枉此生，對呢位前輩致敬。」