與何韻詩歐遊 祖兒冧爆法仔

容祖兒昨日出席活動，承認早前休假跟何韻詩歐遊，但情人節則要買花氹自己！同場的組合Super Junior-M遲大到，沙冧道歉！容祖兒（Joey）昨日以香港歌手代表身份出席《香港亞洲流行音樂節》記者會，早前休假兩個月的她透露曾到多個地方旅遊，問到何韻詩有否同行？Joey說：「何韻詩只係其中一站，咁難得有機會去旅行，咪集齊朋友一齊玩囉！（情人節係咪一齊？）唔係，情人節喺法國，去一個朋友屋企食飯，微博紮花係我自己去花店買嘅，不過今次都有艷遇，唔少法國男仔主動同我傾偈！」

Joey亦否認報道指她跟經理人霍汶希（Mani）反面，她稱早已向老闆請假，與Mani感情亦非常好，才越洋探望她。對於同門師弟林峯與潘霜霜的「床照」曝光，她說：「我諗佢都幾困擾，如果見到面會安慰吓佢，相信佢係畀人出賣！（拍戲嗰陣知唔知？）我個角色淨係對住林峯，唔知佢另外發生咩事。（佢鍾意身材好？）咁咪對我哋呢啲冇興趣！」

SJ-M遲到沙冧

同場的周筆暢、組合LOLLIPOP F、SJ-M、林俊傑及梁靜茹則分別代表中、台、韓、星、馬各地出席，SJ-M姍姍來遲，遲到足足個半小時！成員周覓在台上以普通話道歉。籌委會主席吳雨表示日本代表AAA因受地震影響，未能出席。