糖妹大爆影集體蜜照

宅男新寵糖妹（Kandy）昨日偕糖兄出席環保活動，她自爆私相簿私密度高，無懼如林峯般「床照」外洩，還不避嫌表示曾與緋聞男友Bro5成員Dominic影集體「蜜」照！

組合糖兄妹昨日到屯門出席廢物回收活動宣揚環保。糖妹透露想為日本災民作歌打氣，但不會到當地。對於林峯「床照」外洩，她自言做足加密工夫，確保私相簿不會流出：「我Facebook私密度高，放上微博嘅係公諸同好，中學年代或者同前男友嘅相流出就冇辦法，但冇所謂。（影過『床照』？）印象中冇，唔知瞓咗有冇畀人影。」至於與緋聞男友Bro5成員Dominic有否影「蜜照」？她不避嫌地笑說：「有呀！成班人一齊影集體『蜜』照，個鏡頭唔夠闊就要企密啲。」

陳豪分手即刪相

另外，陳豪昨日出席打吡大賽活動時表示，聽聞林峯「床照」流出：「咁私人嘅相，唔知咩原因走到出嚟，林峯今次答得幾大體，好欣賞佢態度，一齊過影呢啲相唔出奇！」他自爆拍拖時都影過親密照，但已全部刪除，因為記憶已儲存在腦海中。對於無綫小生花旦紛紛轉向內地發展，陳豪坦言仍有約在身：「唔係好多人向我招手，可能知道我係無綫嘅人。」他並表示見到佘詩曼會問她關於離巢的傳聞，若然屬實，《公主駕到》便不能拍續集。