呂慧儀時來 謝天華運到

當家小生花旦佘詩曼、廖碧兒、黃宗澤及馬德鐘等紛傳離巢，無綫引爆「藝員荒」，有人辭官歸故里，自然有人漏夜趕科場！電視史轉入新局面，「咪神」呂慧儀及「Chok師傅」謝天華已整裝待發接棒，Are You Ready？

盛傳無綫一姐佘詩曼外闖，二線小花當然要爭上位！呂慧儀（Konnie）雖位列「咪神」，但卻笑言不敢奢望做「阿姐」：「諗吓梗有……但拍劇要等公司安排，我生得高大，希望公司畀機會我演女強人或者大家姐角色。」她直言不擔心身高「礙事」：「好似陳豪、林峯同馬國明都高過我，我最想同『筍盤』陳豪合作，但相信唔會傳緋聞，因為我怕畀佢班Fans鬧死！」

愛情專一唔睇錢

雖然經常公開晒「導彈」，但Konnie並非刻意行性感：「真係事有湊巧，我第一套劇演『長腳蟹』，要着泳衣騷身材，加上角色有發揮，到依家都仲有人記得！其實我平時一啲都唔性感，但工作需要冇辦法！（介唔介意同高海寧、梁政珏比較身材？）唔會！佢哋後生過我咁多，但我都唔想成日騷胸，怕觀眾睇得多會厭。」

既然是性感尤物，Konnie身邊少不免出現大批狂蜂浪蝶，自從傳與港男黃文迪分手後，她先後與兩大影帝黃秋生及曾志偉傳緋聞：「志偉真係霸晒我中西情人節，但我一直當佢係爸爸！（佢餵你食嘢喎？）唔係點呀？餵到嚟唔食呀？咁好唔畀面喎！」自認專一的她坦言，不會被金錢蒙蔽：「試過畀有錢人追，但我唔一定鍾意！我唔接受一見鍾情，每個男友都係由朋友開始！」

投資有道小富婆

女人當自強，有能力自給自足當然毋須靠男人！Konnie表示從小已懂得儲錢及投資之道：「選港姐嗰陣被踢爆屋企人做生意，我唔係富家女，只算小康之家。其實我都係喺公屋長大，出世唔夠兩個月，間屋因為電線短路燒晒，爸爸要白手興家重新嚟過，所以我好佩服佢，自己都希望唔使靠男人！讀書嗰陣已經出嚟做兼職模特兒，自己搵自己食，到依家我都有供細佬讀書！」她又自爆有買樓作長線投資：「唔講幾大，總之一定唔係幾千呎豪宅，我只係窮苦小業主，政府免差餉已經好開心！」

現年44歲的謝天華於98年加入TVB，由《真情》開始至今經歷13個年頭，終於兩年前憑《學警狙擊》的臥底警察「Laughing哥」一角爆紅，並夥拍影帝再度進軍大銀幕，如今更在新劇《潛行狙擊》中由配角變主角，全速向「視帝」進發，他說：「爭視帝要視乎自己同角色嘅全年表現，夾好天時地利，況且新劇都未知幾時播，唔好講到咁長遠！」

對於小生花旦紛離巢，問到有否欲跟風外闖抑或趁機博上位？天華說：「呢啲冇得計算。（唔做視帝唔心息？）真心嗰句當然想攞獎，但唔係『想』就得，要服眾同得到行家認同當然好開心！（視黎耀祥為最強假想敵？）我唔會以一個人做對手，咁樣唔會進步！」

一夜成名飄飄然

憑「Laughing哥」一夜成名的天華坦言，被捧上天的感覺飄飄然：「周街啲人都叫我『Laughing哥』，覺得自己好掂！但係好快就逼自己面對現實，因為好多人一朝得志，語無倫次，前車可鑑，所以好快就回復正常。」他坦言成名後好壞參半：「家燕姐都成日問我：『天華，你唔使咁謙喎！』我唔敢話自己好紅，但因為多咗人留意，普通言行都會被放大，所以我要警惕自己講嘢要比以前謙虛，費事引起不必要嘅誤會！」

一個男人名成利就，「飛來蜢」亦隨之而來，已婚的天華嚴肅地說：「我話冇都唔信啦！但最緊要清楚自己做緊乜，絕對唔好貪一時之快，行錯就玩完，影響前途仲連累家人朋友！藝人形象好重要，呢啲錯唔可以犯！」謹守「色戒」，加上賢內座通情達理：「太太反而好明白，佢知道呢個係遊戲規則，佢信我！」

好男人絕不難做

巨蟹座出名顧家，問到天華是否一個好男人？他說：「我唔敢自己講，但我認為一個男人必須對家庭負責任，令老婆同屋企人開開心心，唔使憂柴憂米，好男人唔係咁難做！」今年情人節，天華與老婆到北海道旅行，結婚六年仍然恩愛，羨煞旁人！

後記:敗犬，Have Fun！

開朗的Konnie經常笑唔停，即使曾被網友懷疑是「變性港姐」，但她仍EQ高地表示「得啖笑」：「唔嬲！幼稚園同小學同學都可以幫我做證！」別以為性格開朗一定貪玩，想不到她竟自封「宅女」：「我都敗敗哋（敗犬），有時徐淑敏都會叫埋我去食飯，佢啲朋友可能有啲家底，但我都唔吼！寧願留喺屋企玩貓，佢就係我伴侶喇！」

Chok樣，Why Not？

繼林峯後，天華被網友戲謔為「Chok天華」，天華自辯：「呢個係劇中『魚至囂』嘅角色設定，因為佢成長背景複雜，收埋好多秘密，所以成日皺眉，其實佢見到女朋友會笑o架！上次演『Laughing哥』就有啲後生仔叫我『大佬』，今次『囂師傅』就話我Chok夾囂，觀眾批評都係因為睇得投入，我不但唔介意，仲好開心添！」