馬德鐘遭無綫冷待心灰北上

近日盛傳不少無綫小生花旦離巢外闖，有指馬德鐘將北上搵銀，年底約滿的他昨日坦言，樂易玲未有約他食飯傾續約，宣萱亦撐他離巢拍內地劇！

宣萱及馬德鐘（Joe）昨日為無綫新劇《飛虎》拍攝追賊戲份，Joe更飛車救宣萱，英雄救美，不過宣萱卻有苦自知：「我喺小巴車尾上拍攝動作鏡頭，小巴一開，啲雨就由車頂淋落嚟，十足瀑布咁，淋足一日呀！」不過她坦言很Enjoy，因為角色很有發揮：「我不嬲恨做差婆，平時都係做律師嗰啲多！」

冇乜存貨 珍惜機會

對於被指約滿無綫後，將離巢北上發展，Joe不願透露是否離巢：「未知係咪再簽無綫，都傾緊！我冇講過真係走，只係話想個巿場大啲！（樂易玲有冇約食飯傾約？）冇，可能佢見我忙，等我忙埋先！」年底約滿的他不諱言內地有人斟他簽經理人合約，拍完《飛》劇後會拍內地劇。另外，他表示落雨拍動作戲會分外小心，因為之前不少同事受傷，加上同期要宣傳劇集《洪武三十二》，令他相當辛苦：「我都冇乜存貨，會珍惜宣傳機會！」

至於宣萱則表示不知情，但仍不忘力撐Joe：「佢絕對得！佢有好多朋友，大家都要搵錢嘅，依家唔搵幾時搵呀！拍完呢套我都去第二度拍劇，搵吓真銀！」