張家輝搵律師向滋事者宣戰

曾是警察的張家輝，近日為保護一名內地恐嚇事件的受害人，不惜自掏腰包諮詢法律意見，更不排除日後以證人身份伸張正義。日前他被拍得一家三口享家庭樂，心情似乎未受事件影響。

文：影視組　攝：追蹤組

家輝一度是微博擁躉，與網民分享電影及生活點滴，想不到竟遭惡意抨擊，一時指家輝患有性病，一時又質疑關詠荷對他的忠貞，最離譜的是質疑家輝囡囡Brittnay的身世。

女粉絲捲入事件

家輝起初無意就這些「戲言」而動氣，但近日事態愈趨嚴重。有上海女影迷留言撐他後，即被人出言恐嚇，相約她出來交涉面談，又指若她不現身的話，將會上門「搞她」。女影迷公開道歉後，仍遭「咬住唔放」，令家輝為之氣結，近日主動聯絡上海律師，尋求法律意見。他昨日更在微博留言：「世界上沒有免費的午餐，罵了這麼久，不負做人責任這麼久，結帳的時候到了﹗」寓言「大戰」一觸即發！

家輝昨日接受電話訪問時說：「最睇唔過眼呢啲欺凌事件，如果嗰位女影迷打算報警，我可以飛去上海做證。要搞就搞我，我歡迎佢哋隨時嚟香港，透過英皇電影搵我出嚟傾。我行得正企得正，如果咁都驚點做人呀？（佢哋稱你太太係女神喎！）我太太喺內地係有班忠實粉絲，佢哋嚟香港我都有見過，個個都好乖好斯文嘅。（太太心情點？）佢都有唔開心，不過我唔想佢牽涉在內。」

考慮關閉微博

家輝有感一切問題源於微博，去年曾一度將所有留言刪除，「停博」兩個月後「捲土重來」，問題竟愈來愈嚴重，難怪他說：「網絡嘅世界真係好恐怖，所有言論都可以不負責任嘅，我依家諗緊真係要『閉博』囉！」

另外，日前家輝偷得浮生半日閒，與太太及囡囡Brittnay現身銅鑼灣大型家品店Shopping，途人大讚五歲的Brittnay可愛，期間發現有狗主拖狗散步，她即拉着家輝一齊睇狗，隨後三人才到停車場取車離開。

刑事恐嚇最高監禁十年

黃國桐律師指內地刑事恐嚇的刑罰不輕，最高監禁十年，最基本是行政處分：「請律師幫手效用會大啲，表示嚴格對待事件，公安都會快啲着手處理。律師喺內地報警要親自現身，張家輝就唔使現身，至於嗰個女Fans就有可能要接受調查。因為威脅嘅感覺好主觀，要睇番佢自己覺唔覺得受威脅。」