「瀛鴨」王宗堯以波會友

影壇新人王宗堯與導演潘源良在電影《出軌的女人》中結緣，兩人是波友、戲友、飯友兼酒友，在足球場上頭來腳往，以踢波喻戲！

文、攝：專案組

王宗堯（Greg）與潘源良在飯局中認識，當時計劃開拍《出軌的女人》的潘Sir，即邀Greg「做鴨」：「做鴨唔一定要鴨眉鴨眼，夏文汐、吳家麗同葉璇扮有錢女人，唔會搵騎呢蘇，今次套戲搵到好演員配合佢哋，我知道Greg識日文，所以搵佢做來自日本、喺內地Club搵食嘅鴨。」

Greg於片中與葉璇有不少火辣對手戲，埋位前他先跟對方傾偈熟落：「同佢做戲感覺好放心。」他又指潘Sir給予演員很大發揮空間：「佢只係決定節奏，其他演出畀我哋自由發揮，對演員好有耐性。」

與阿倫球場競技

潘Sir與Greg同樣愛波如命，經常與譚詠麟等一班明星足球隊隊員在青草地上較技，潘Sir表示睇人踢波或做戲均可看出性格：「Greg踢波好落力、會追波，做戲都一樣，好有Heart！」Greg亦向導演大笠高帽：「喺球場上，潘Sir喺中場派牌，穿插到成隊波，喺片場都一樣，貫穿現場所有事，好重要！」