樂基兒讚黎明唔奄尖易服侍

樂基兒昨晚以首飾品牌Folli Follie全球代言人身份出席上海舉行的春夏派對，她坦言早前到巴黎拍廣告，共三個造型，覺得很好玩，是難得的機會，問到會否設計珠寶首飾？她說：「傾緊。（同品牌合作出定自己出？）未知呀！好多嘢想做同想試，要用好多時間，不過我覺得老啲試都得。」

她坦言有密切留意日本地震及Email當地朋友：「我知佢哋安全，我一定會捐錢，睇吓有乜幫手！（暫時唔去日本？）當然！佢哋經歷災難，要時間復原。」她坦言曾在美國經歷地震，由於當時年紀小而唔識驚：「學校都有教，遇到地震要匿喺枱底同門框底。（擔唔擔心輻射？唔敢食日本進口食品？）相信政府會保護我哋，冇得驚，亦唔需要驚。」

望陳慧琳保重

對於陳慧琳不幸流產，樂基兒坦言有聽過，希望對方好好保重身體，不要再提不開心的事，而她自己的生活很開心，多時間照顧家庭及老公黎明：「有貓貓狗狗要照顧，仲要種番茄、波菜、杧果、荔枝同牛油果，我鍾意種植係因鍾意煮嘢食。」問到是否一位稱職太太？她直認不諱：「都OK！（老公讚你？）間中都有。（佢難唔難照顧？）都OK！佢唔奄尖，人夾人，唔太辛苦！」

攝：黃叔榮上海傳真