鍾嘉欣割席 阿佘在心中

靚仔小生林峯Chok功深厚，曾與不少花旦傳緋聞。對於林峯驚爆「床照」，佘詩曼說：「我印象中阿峯係細路仔，好想搵個好女仔拍拖同結婚。（畀人跣？）惟有專心工作，調節心情。（慰問？）佢好堅強，唔想煩人，總之我哋係好朋友，在心中！」而憑《談情說案》與林峯「升呢」螢幕情侶的楊怡，昨日與老拍檔雙雙試造型，她看畢照片後嘩然：「應該點樣畀反應呢？不過呢啲係私人嘢，如果佢拍拖都恭喜佢！」

至於在《溏心風暴》中與「管家仔」林峯奉旨談情的「常在心」鍾嘉欣，趁機否認緋聞：「我哋拍戲傳緋聞啫！大家都知係假！（曾經鍾意？）做咗六年抽離到嘅！（藝人拍拖要小心？）如果真拍拖會好投入，影呢啲相好正常！」而「峯女郎」1號李彩華說：「我覺得佢好可憐，加上阿峯依家嘅事業如日方中，因為呢件事都令到我拍拖會膽怯！」

樂易玲早知「情」

此外，視林峯如半個兒子的無綫高層樂易玲，昨日已安慰及勸解他：「佢仲係細路仔，大把機會！佢喺開記者會前已經見咗我，我話要坦白面對，其實今次阿峯拍拖身邊人都知，佢都有帶過個女仔出嚟見我，仲話如果撞破都會認，只係一直冇影到！（佢畀人出賣？）既然分咗手都冇辦法，佢咁忙都冇時間諗呢啲嘢！」