祥仔留巢獨攬：我做晒！
黎耀祥昨日到黃埔一間小學出席《小母牛—滙豐「開卷助人」》活動，他希望日後能帶兒子扶貧，惟因工作忙而無暇實踐：「TVB點度到期吖？連搵錢嘅工作都度唔到啦！」有傳林保怡、馬德鐘及佘詩曼約滿無綫後皆北上搵銀，阿佘更被傳扮傷手辭演《法證先鋒III》，身為《法》劇男主角的祥仔說：「以阿佘嘅級數都唔使詐病，話唔拍就唔拍啦！」
有傳內地片商以千五萬元利誘阿佘拍劇，問到可有興趣北上發展？祥仔說：「我鍾意香港多啲，部頭形式仲有得諗。個仔仲細，好珍惜睇住佢成長嘅時間，搵到幾年錢又點吖，自己都幾十歲啦！香港需要我，其實係我需要香港先真！個個走晒得番我做晒，多啲嚟密啲手。」他透露與無綫合約還有年多，毋須傾新約。
小學生紛紛圍着黎耀祥攞簽名及合照，大受歡迎。