楊思琦碌落台入急症

楊思琦與曾志偉前晚在澳門演出，同告失足由樓梯碌落台，思琦扭傷腳腫如豬蹄，前晚返港後要到急症室治療。而武師出身的志偉身手敏捷，碌落樓梯完全冇事，還可扶思琦一把！

受傷的思琦前晚乘船返港期間愈來愈痛，落船後即到急症室求診，照過X光後證實並無骨折，但要休養四、五天。她原定昨日前往丹霞山拍旅遊特輯，但因傷腳不能成行，無綫臨時換上黃智賢代替。今次意外，估計是他們踏到不平坦的台階，因思琦着高跟鞋，所以跌得較傷，除扭傷右腳外，右肩亦撞瘀，頸、腰部位也拉傷，思琦將「豬蹄腳」照片上載微博並寫道：「全身痛，要暈了，寸步難行！」

讚志偉好身手

記者昨日訪問思琦，她說：「依家仲覺得好痛，膊頭都撞瘀咗！（繼續演出？）係呀！之後都上番台做埋個演出先走，夜晚搭船先覺愈來愈痛，返到香港咪去咗睇急症，我今日都去唔到公司個旅遊特輯。（傷勢？）照X光就冇骨裂。（雙親、男友擔心？）唔敢同阿媽講，怕佢擔心，男友（李永豪）都知，佢都知意外冇辦法！（志偉有冇事？）佢真係好身手，同我一齊跌，但完全冇事，仲可以拉住我！」

武師出身的志偉昨日說：「我冇事呀！我怕壓親思琦咋！不過我都要讚佢夠專業，跌倒仲要上台繼續演出，同觀眾握完手先走！（擔心喺大阪嘅仔曾國祥？）係呀，但當日下午聯絡到佢就冇驚啦！佢話大阪嗰邊唔係好覺震！（佢套《戀人絮語》攞最佳電影獎？）係，好開心，會同佢慶祝！」