杜如風目擊災情泣不成聲
杜如風（Helen）上周五帶團到日本東京，遇正世紀大地震，前晚終平安返港，她表示返家即摟住母親相擁而哭：「我係咁講對唔住，要佢哋擔心真係好不孝！人真係太渺小，要珍惜生命，孝順父母。」心情仍未平復的她指地震首日每隔15分鐘便震一震，見到街燈打橫搖，在酒店睇新聞至凌晨5時，見災情喊到收唔到聲：「個心好似畀刀斬咁，自己好驚，係我遇過最厲害嘅地震，但要做到好鎮定令團友安心，原本去海邊食海鮮行程，都因為驚危險取消咗。」Helen又轟航空公司趁機掠水：「成萬七蚊張機票，不如捐出去幫國民，好忟啊！」
另外，Helen日前在微博稱日本為故鄉而與網友掀輕微罵戰，林敏驄即叫她不要嬲。而薛家燕在微博透露兒子Jackson前晚從東京返港：「從他說話獲悉今次在東京的歷程是驚心動魄的，只不想我們擔心，當時沒有說出來。」日前在大阪出席電影節的曾國祥，昨晚亦已返港。