菲紅駕到潮爆

姹紫嫣紅，看得令人心花怒放，不過大紅大紫，並非每個藝人都可以Carry得到！星級形象指導郭慶彬（Ricky）勁讚王菲的連身裙，只有她才能駕馭得到，凡夫俗子只得望其項背！

王菲入型入格9分

Ricky：「阿菲條連身裙有型有款，又紅又銀咁，唔係個個都可以着到，換轉第二個人一定着到九唔搭八！阿菲好醒，配上Lace絲襪更見美感，同佢嘅型格相輔相成，係絕配！」

容祖兒潮之高峰8分

Ricky：「一個字：『靚』！中式旗袍配傳統Details，加上龍圖案點綴，同埋花碌碌嘅絲襪，簡直係中西合璧嘅Crossover！望埋佢個時尚髮型，將潮味推上最高峰！」

楊梓瑤靠Boot補飛5分

Ricky：「淺粉紅背心好襯Carol嘅年紀，不過都只係賣胸衫一件，佢可再着得少女少少，起碼個髮型都要轉轉，幸好對Boot幫佢加唔少分數！」

朱璇處理得宜6分

Ricky：「條裙雖然成熟咗啲，不過朱璇Carry得好好，加上首飾點綴，好配合到個場合，亦唔會顯得佢太老！」

江怡髮型累事3分

Ricky：「真係唔得！未夠20歲嘅Betrys因為髮型搞到好老，唔係靠鮮色衫先可以穿得你Young，而係要靠整體感覺，距離合格仲差好遠！」

陳嘉桓膚色絕配6分

Ricky：「嘉桓嘅膚色本身好健康，同條裙嘅粉紅色好夾，不過條裙嘅Cutting可以再Slim啲，凸顯番佢嘅身形，咁會更靚！」

梁詠琪泡泡誘惑7分

Ricky：「條泡泡裙好襯GiGi，喺演唱會度更見況味！加上佢嘅模特兒骨架，營造出波希米亞嘅潮流感覺，好型！」

趙碩之有胸賣胸2分

Ricky：「繼續賣胸，真係好『凸』出，不過令人睇到厭！加上條裙隻色同碩之唔襯，好有『有胸賣胸』嘅感覺！」

Ricky Profile

郭慶彬（Ricky Kwok）加入時裝界8年，以廣告形象指導工作為主，曾任名模樂基兒及熊黛林的形象指導，並在銅鑼灣開設時裝店，主要售賣日本及英倫時裝。