Miley噴火媽媽聲

迪士尼青春偶像Miley Cyrus近日盛傳有新歡，原本心情勁靚的她前日為保護被撞的母親而鬧爆狗仔隊！

早前於《周末直播》扮嘢搞笑而贏盡掌聲的Miley，日前被指搭上著名樂隊Kings of Leon的成員Jared Followill。原本心情勁靚的她前日百忙中抽空與母親Tish到荷里活一間Cafe食晏享天倫，但遭狗仔隊攔截！當她們離開往取車時，Tish幾乎被一名記者的攝影機撞到，原本帶笑離開的Miley見狀即變臉喝罵該名記者：「搞乜呀你！你嚟真o架！」並衝向對方，邊用手遮掩鏡頭邊鬧爆，指其攝影機撞親母親。該名記者否認對Tish不敬，但Miley有理冇理，繼續對着他的面部手指指說：「你以後唔好再咁樣！你差啲撞到我阿媽！你諗都唔好諗咁做，我認真嘅！簡直係瘋狂，你差啲撞到我阿媽！」

傳媒讚值得學習

雖然Miley變身潑婦罵街，但有傳媒讚其保護母親的率直行為值得學習，可是有網友指她小題大做：「我覺得佢唔需要咁惡，個狗仔隊撞到佢阿媽時，已經舉起攝影機避開，亦唔見得撞親佢阿媽！如果佢阿媽真係畀人撞，自然反應會立即抱住個頭。」不過，有網友撐Miley護母心切才鬧狗仔隊，批評該名記者走得太近。