阿樂豪買370萬名車
一直愛揸靚車的余文樂，最近豪擲約370萬元購入超級跑車林寶堅尼GALLARDO COUPE，日前即駕駛落地一日的「新歡」，相約沈嘉偉細佬外出遊車河。
近年片約不斷的余文樂，自從與沈嘉偉、郭富城和張智霖等「玩車兵團」埋堆後，出手變得愈來愈闊綽，生活質素亦大大提升，除於09年由舊山頂道月租三萬元的曉峰閣，搬往位於中半山梅道月租六萬元的蔚皇居外，就連代步的跑車亦愈換愈豪。
拍照勁興奮
已分別擁有寶馬M5、平治C63、限量版Jeep Wrangler四驅王等名車的樂仔，於本月7日再豪擲約370萬元，購入一部2011年出廠的超級跑車林寶堅尼GALLARDO COUPE。據知，他在月前已開始訂購。新車落地剛一天，樂仔已急急相約沈嘉偉細佬沈健偉，齊齊駕駛同色同型號的林寶堅尼外出遊車河。
當晚凌晨一時半，二人駕車至灣仔一間油站入油，心情異常興奮的樂仔，拿着電話不停為自己「新歡」及沈健偉的跑車拍照，兩人又一起研究。期間見樂仔不時在兩部跑車旁邊左看右看，似是跟沈健偉的座駕作比較，其後又請教有關該車的細節，入完油，兩人才分別驅車離開。
圓十年夢想
昨日記者致電樂仔，他表示儲了十年錢，並指林寶堅尼車是他的Dream Car：「今年係我出道十周年，入行時已經諗住買咗樓畀媽咪，照顧好屋企人，等到有能力先買呢部Dream Car畀自己。其實都冇諗過畀人知道，如果唔係都唔會半夜先出嚟兜風。」
另一方面，提到近日政府增加私家車登記稅，其座駕比未加稅前需繳多二十多萬元稅，樂仔說：「好慘！好肉赤！好似切咗我忽肉咁，惟有勤力工作啦！（媽咪有冇話你？）佢哦咗我一聲，咁佢都知我鍾意車嘅！」
