陳偉霆情挑夏文汐冇向阿Sa取經
陳偉霆（William）昨日聯同夏文汐、吳嘉麗及葉璇宣傳新片《出軌的女人》，他說：「戲中我有好多場激情戲。（向女友阿Sa取經？）我諗佢未拍過啲咁激嘅戲，導演想我露全股，我掙扎好耐，公司都唔想，我又覺得未Ready，最後都有拉低褲拍，但未睇，唔知露幾多。」
而夏文汐大讚William表現令人印象深刻：「睇好佢同吳嘉麗攞獎，佢哋啲戲好搶，我同葉璇有場戲，葉璇邊向我剖白，邊錫我、摸我、錫我胸，去得好自然，幫到我演戲。」吳嘉麗則鼓勵女性要活得開心大膽：「呢個年代女人開放咗，有空間劈腿，有時候唔好對死一個，出去試吓其他男人，唔一定要發生關係，令自己開心啫！最緊要唔好泥足深陷。」
陳偉霆和吳嘉麗聯手谷戲。
葉璇和夏文汐戲內戲外也咀不停。