糖兄妹 RubberBand甜苦調和

近年香港樂隊及組合抬頭，RubberBand（RB）與糖兄妹更是火速上位，前者將於本月開騷，發放正能量，為樂壇補充養分；後者的「糖妹」Kandy成為新任可愛教主，招牌甜笑為樂壇注滿「糖分」﹗

樂隊RubberBand（RB）年初於樂壇頒獎禮大豐收，本月又開騷，認真忙碌！對於近年樂隊抬頭，RB直言是好事，談到經常被拿作與Mr.比較，RB成員泥鯭說：「有競爭先有進步，當然係比較音樂作品，而唔係喺新聞、獎項同銷量上，我哋同Mr. Friend底，鍾意RB嘅又可以鍾意Mr.、糖兄妹或者HotCha。」

問到是否接Band壇班霸Beyond棒，泥鯭續說：「樂隊從來冇離開過香港，只差在有冇人留意！比較多人識係Beyond同太極樂隊，我哋會努力推動廣東歌，Beyond都要經歷好多年先有成就，我哋冇話要接班，總之要做好音樂。（樂隊抬頭？）近年好多創作團隊同歌手加入樂壇，好似C AllStar、農夫同糖兄妹咁，大家炮製唔同音樂，好似一杯咖啡，落多奶就冇咖啡味，咖啡太多又苦得滯。」

問到會否因應娛圈規則作出妥協，例如參加遊戲節目？泥鯭說：「唔會刻意抗拒，但最緊要舒服，唔好突兀。」

名利雙收搵多咗

縱然合作無間，成員阿偉承認亦有爭執：「我哋係明刀明槍拗撬，主要係解決方法，但唔會話『開火』咁誇。」問到如何保持今年優勢，主音6號說：「繼續Open-minded，每年會定好計劃，吸取去年嘅經驗，希望新一年做好啲。由入行到依家三年，我哋做人處事都成熟咗。」

四子將於本月舉行五場音樂會，票房反應理想，問到是否豬籠入水？RB笑說：「收入係改善咗，開心嘅！搵錢方面，同事同經理人嘅壓力大啲，我哋專注音樂。」

後記:期待與小肥合作

RB雖然由「五變四」，但音樂熱誠不減，更希望與不同歌手合作，並點名最想與男歌手小肥合作：「我哋差唔多同期出道，講咗好多年要合作，大家都有情有義，呢個係情意結，希望可以快啲同佢合作。」

RubberBand成員：

6號（主音）

阿偉（低音結他手）

阿正（結他手）

泥鯭（鼓手）

專輯：《Connected》、《Apollo 18》、《Beaming》

獎項：新城勁爆樂隊、叱咤至尊歌曲大獎、十大中文金曲全年最佳進步獎金獎等。

唱作組合糖兄妹出道至今走開心路線，「糖妹」Kandy憑Cute爆形象成網友新寵，有指糖妹還爭贏宅男偶像G.E.M.與官恩娜等，取代周秀娜成為日本潮店Image Girl，人氣急升。

對於成為宅男新寵，糖妹乍驚還喜地說：「唔知係好定唔好，不過早排出騷，見到男男女女塞爆商場，有女Fans讚我：『糖妹好可愛！』我當然唔抗拒，但唔係完全覺得自己好得意，我哋都會唱《一瞬間》呢類悲情歌。」

突然成為傳媒追訪對象，問到有否「竄紅」感覺？糖妹說：「係多人認識咗，但距離『紅』仲有好遠好遠，喺我心目中梅艷芳、張國榮同周杰倫先叫做紅。」

主動向圈中人求愛

至於是否多了追求者，糖妹否認，並自爆已心有所屬，但拒透露對方身份：「好少男仔追，可能我有心上人，佢係圈中人，我好主動求愛，但呢啲順其自然。」外傳曾力追糖妹，糖兄否認，並坦承已有女友：「我以前似『毒男』多啲，唔係宅男，我都唔鍾意匿喺屋企，依家兩樣都唔係。」

近年樂隊與組合大放異彩，糖兄妹認為是好現象：「公司畀咗好多資源，我哋自主性都大咗，係幸運兒。」糖兄說：「樂迷鍾意睇Live Show，即興玩樂器可以帶動氣氛，呢啲係Live嘅感染力。」但他們不擔心有比較：「RB嘅音樂風格係社會性，Mr.係熱血青年，我哋係開心派，外熱內滾！」

格食格更顯默契

糖兄妹雖然沒有血緣關係，但默契純熟，比真正「堂兄妹」更親近，糖妹說：「我唔會發人脾氣，通常有唔對路，會諗第二個方法解決，有時其中一方認低威，畀對方一個落台階。」糖兄則說：「其實我哋咁夾，就係因為各有特點，互補不足，所謂格食格。」

後記:變身A貨被錯認

糖妹表情豐富，被封「嫩版陳慧嫻」，她亦自覺相似：「試過被認錯，亦有人以為我係o靚模陳嘉寶，但佢高啲靚啲啦！」

糖兄妹成員：

糖兄阿峰（結他、作曲）

糖妹Kandy（填詞、主音）

專輯：《3 Wishes》、《我最愛糖兄妹》、《Love Memory》

獎項：新城勁爆新人王（組合）、十大中文金曲最有前途新人金獎、勁歌金曲最受歡迎華語歌曲獎等。