諸葛梓岐幸福無價

每個女生都想嫁得好，獲白馬王子守護一生，現年28歲的諸葛梓岐被封為真人版公主，「王子」薛嘉麟向她求婚成功，儘管凡夫俗子確信公主只差一步便踏進億萬城堡，天生唔憂米的她確信愛情豈可與金錢掛鈎，嫁入豪門講心唔講金！

甚麼是快樂？「婚姻比個人的事業更重要，一個獲得美滿婚姻的人，遠比一個人孤獨的天才更為幸福快樂。」諸葛梓岐（Marie）在微博上說，流露甜蜜的待嫁心聲。跟Neway二少薛嘉麟拍拖兩年，經常高調晒恩愛，Marie早前首度開腔說：「我要結婚了！」這位準新娘子「命運」確實令人羨慕，本身是諸葛亮後人，又有位愛錫自己的男人，是個唔憂米的有錢女，入行以來被人以「公主」般看待，如今決定與最愛拉埋天窗，展開人生新階段。

相信一見鍾情

Marie與薛嘉麟的愛情始於兩年多前，他們在一個聖誕節派對上認識，當時剛由外國返港的Marie，還不知道「Neway」是一間卡拉OK，對男友的第一個感覺很不錯，大概這是她口中說的緣分：「我初初覺得佢好有風度，大家幾多話題，感覺唔錯，都有少少觸電感覺，我信緣分，啱唔啱傾好重要，有啲男人係我一世都唔會諗同佢一齊，但佢就第一眼已經有諗。識咗佢之後，覺得佢好孝順、有愛心，係一個好本事嘅人。」

愛苗極速成長，當時已入娛樂圈的Marie，要在塊是非地拍拖絕不容易，經常成為追訪對象：「都大壓力o架！有時見到人哋亂寫，真係好唔開心，雖然當中涉及佢，但佢比我更加樂觀，叫我一係唔好睇、一係睇完笑一笑就算，叫我唔好太執着。」Marie坦言最不開心是傳媒將她寫成公主病，被指刁蠻任性，幸而身邊有位了解她的男友：「男友好了解我，佢同我講人哋點講唔重要，唔好放喺心。」

求婚一刻感動

早前Marie自爆去年與男友聖誕旅行時已答應結婚，她坦言求婚一刻十分感動，卻未有流下開心眼淚，她解釋自己比較理性，反而母親聽到喜訊非常開心，她說：「我媽咪都想我結婚，因為佢都比較傳統，梗係想我嫁人，做個好媽咪、好老婆，我好細個佢就教我，一個女人，家庭幸福先會畀你真正嘅幸福。」

不過早前宣布年底嫁人的她，婚期可能有變：「其實我咩都未知嘅，依家係男方搞，我要做嘢，嚟緊要幫亞視做個飲食節目，啱啱開會先知要拍到年底，我都驚冇期，唔得就下年囉！」

生四個冇問題

說得輕鬆，難道事業比婚事更重要，她說：「唔係，我覺得女人嘅終身幸福始終係結婚，不過事業都緊要，同埋應承咗拍個節目，冇理由為咗結婚而要大家遷就！」以為她心中有個公主式童話婚禮，原來那個念頭早就「幻滅」，她說：「大個已經冇咩童話婚禮，細個就成日都會諗，但現實還現實，依家我冇諗過咩盛大婚禮，其實我鍾意旅行結婚，因為覺得浪漫啲，不過中國人比較傳統，老人家都係鍾意擺酒，見住孫仔開開心心。」

本身家底不弱的Marie，入豪門更未感壓力：「愛情唔係同金錢掛鈎，係講緣分。我同男友都會有鬧交嘅時候，不過大家會肯讓步，之後就會和好如初。」Marie坦言婚後會繼續工作，至於生兒育女？她說：「我媽咪勁想，我都想嘅，因為都鍾意小朋友，可以生3、4個都冇問題，熱鬧啲吖嘛！怕唔怕痛？我怕o架！依家唔想諗住，生BB亦唔係自己話生就生到，要各方面配合，所以生仔痛唔痛遲啲先諗啦！」

曾萌退出之念

提到事業，Marie表示今年將成為空中飛人，除要接拍亞視的飲食節目，又要在日本出唱片做歌手，相信是一個大考驗。她又表示入行後曾受到事業挫折：「我個人口直心快，有時講咗啲嘢令人唔舒服都未必會知，依家言行會小心啲，點解唔想做？有一次我真係有諗過，因為我初初以Model身份入行，以為影嘅相可以好Fashion，甚至好似美國雜誌嗰啲咁，但有一次同我想像出嚟差好遠，嗰刻真係想喊，想過唔做，公司之後勸我先留低。」

後記：善有善報

與李家億萬新抱徐子淇的名字同音的梓岐，同樣是幸福小女人，Marie一直被指嫁入薛家的「手段」是行奶奶政策，她即否認說：「其實我由細到大都信佛，媽咪亦都係，所以唔係外界咁寫，我本身相信因果，都係覺得善有善報，不過我同薛太關係係好好，因為大家有佛緣囉！」