可嵐咇7磅2男嬰似爆石

前歌手可嵐前晚順利誕下重七磅兩安士愛兒，老公尤子威更入產房打氣，可嵐笑言生仔過程似「急屎」，認真搞笑！

前歌手可嵐前日下午由老公尤子威陪同入院待產，因BB體形愈來愈大，醫生決定幫可嵐催生，她陣痛四小時後成功誕下愛兒尤俊，並第一時間上網報喜及上載照片，獲蔡少芬、歐倩怡及泳兒留言打氣及恭喜。

初為人母的可嵐說：「感覺好似急屎一樣，醫生不斷叫用力，我一用力就咇咗出嚟，真係唔敢想像。」她透露老公全程在產房陪她：「佢好大懵呀！帶晒相機同攝影機入去，因為太緊張握實我隻手，所以一張相都冇影。（BB似邊個？）老公。」她還表示陣痛過程相當痛苦：「痛到握拳同大叫，終於知道母親偉大。（BB改咩名？）叫尤俊，英文名係Eugene。」

譚耀文添千金

此外，譚耀文亦榮升第二任老竇，他說：「經過上次生仔經驗，今次唔想騷擾傳媒，唔係玩神秘。囡囡出世三日我就要返番內地拍戲，所以陪唔到老婆出院。（BB叫咩名？）中文名未改，英文名叫Tamia，國語音係『甜蜜』。（再追？）唔追啦，已經有個『好』字。」