莊思明密會狂電陳司翰

性取向成疑的莊思明，自爆出與同性密友李詩藍的六年關係後，有指她為保港姐形象極速跟密友斬纜，最近還被發現轉嗒陳慧琳弟弟陳司翰！日前約晚上9時，二人到灣仔星街一間餐廳撐枱腳，陳司翰傾得手舞足蹈，逗得女方不時甜笑，十分投契！而莊思明則大展冧功托着下巴，情深款款望着男方瞇眼微笑，對方顯得相當受落。約兩小時後，陳司翰先行步出餐廳，開門讓莊思明步出，其後步行取車，莊思明登上陳司翰的座駕後，在車廂內聊天，傾談約十分鐘才驅車離開，駛至銅鑼灣避車處停低，繼續吹水五分鐘，未幾莊思明獨自下車往夜店消遣，陳司翰目送女方離開才驅車走人。

記者致電莊思明求證，她說：「當日我的確係同陳司翰一齊，我哋只係好傾得埋嘅朋友，唔係拍拖。（陳司翰好似有女朋友喎！）以我所知就冇喇！（追你？）感覺唔到喎！（之前嘅斷背新聞嚇怕對方？）唔關事！可能係自己太男仔頭，男性朋友都當我係兄弟。」而其姊莊思敏亦表示認識陳司翰，間中會一班朋友出來玩，感覺很Gentleman，但印象中對方已名草有主：「佢好似有女朋友。（思明話冇喎！）總之雙方單身情況下發展就冇所謂，所以最好拍拖前搞清楚。」