陳慧琳佗孖女捱踢最冧

懷孖女四個多月的陳慧琳，日前作產前檢查時任影唔嬲，提及腹中囡囡更笑到四萬咁口，她透露孖女開始踢她，在肚中不停郁，極為活躍！

潮媽陳慧琳（Kelly）一直恨追女，早前人工受孕懷有孖女，開心不已，近月減少工作，深居簡出養胎。不過，日前Kelly為作產前檢查罕有出動，當日下午時分，她在經理人鍾珍及助手陪同下，前往中環一間醫務所檢查，雖然當日天氣已回暖，但為免着涼，她穿上冷外套及厚皮褸，一向貪靚的她還放棄着高跟鞋，改穿平底露趾涼鞋。

幫蝦餃仔推車當運動

離開時，Kelly見記者拍照顯得愕然，挺着大肚子的她本欲急步上車，但被追問到兩個寶貝女是否開始踢她時，她興奮冧笑，嗒晒糖地說：「開始踢我喇！成日喺個肚郁吓郁吓！（老公已戒煙？）有冇戒就唔知，但唔會喺我面前食，佢都好緊張o架！放工即刻返屋企陪我同個仔。（做產前運動？）我每日推蝦餃仔出花園玩車仔咪當散步做運動！」

此外，她表示已戒掉每日必吃的公仔麵，改吃番茄及飲水鴨湯增加營養。問到掛在車上的洋娃娃是否買給女兒的玩具，她未有回答，笑笑口向記者道別。