諸葛爆響口12月嫁得

模特兒諸葛梓岐多次與Neway太子爺男友薛嘉麟傳婚訊，前晚她首次開腔承認將於年底出嫁，最想成為12月新娘，恨嫁恨到出晒面！

模特兒諸葛梓岐（Marie）前晚出席iBlues活動，被追問結婚事宜，她甜笑表示與男友薛嘉麟達成共識，默認婚訊！問到男友如何求婚？她說：「講出嚟會怕醜，男仔要型！總之好浪漫！（幾時結婚？）年底。」其工作已排至11月，她希望12月出閣：「睇男友安排。（家人知道？）知，媽咪好鍾意佢。（未來奶奶？）我哋相處好好，好鍾意佢，佢都幾鍾意我！」

問到未來奶奶是否喜歡她比未來妯娌陳法拉多些？諸葛避忌地說：「佢嘅嘢唔講。（搵佢做姊妹，冰釋前嫌？）要安排吓先，依家先三月初，未諗呢啲。（點形容你哋嘅關係？）好正常。（佢知你哋結婚？）問番佢啦！（過年時佢有冇派利是畀你？）冇見到佢。」

求婚細節唔講又講

問到為何不戴求婚戒指？諸葛說：「要做嘢。（幾多卡？）心意啫！」再問到男友求婚的情況，她終忍不住說：「喺農曆新年嗰陣去美國玩，都係嗰排（求婚）！（喺美國註冊？）唔會，係我一定會講，我好誠實。」對於梁洛施的「分」訊，她表示不認識二人，至於嫁入豪門有否壓力？她說：「愛情係講心，要好多天時地利，有愛先最重要。」