華哥噴火掃把曾俊華

曾俊華昨日突然轉軚補鑊派糖6千大元，不過圈中人圍插他亡羊補牢，出名火爆的黃日華更叫政府另聘高明，袁詠儀則矢言會上街遊行！

曾俊華炮製一份超廢財政預算案，引起全城民怨沸騰，曾俊華終還富於民，把原本大家要到65歲才拿到的6千元強積金，「現兜兜」派給滿18歲或以上的香港永久居民！曾俊華後知後覺，不少藝人都慨嘆為何亡羊才識得補牢，當中「噴火華」黃日華更噴到政府一面屁，在微博直斥其非！

秋生：攞水撲火

噴火華於微博寫道：「後知後覺，畀人鬧完先至補鑊，點解唔一早做好啲呢個職位另聘高明吧！」噴火華句句有骨，還寸爆曾俊華黔驢技窮：「香港政府知道我和三哥（苗僑偉）要移民澳門後，決定效法澳門政府，凡18歲持永久身份證，皆可獲得6,000元，藉此挽留我和三哥留港。三哥你點睇呀！」昨日他接受本報訪問時說：「香港政府見步行步，淨係識得有事先嚟補鑊！應該一開始就做好啲，6千蚊對基層好重要，除咗解決經濟外，佢哋個心都會舒服啲！」

黃秋生亦不留情面，狠插曾俊華：「之前都話強積金係錯誤決定，香港窮人多，自然引起民憤，依家派錢等於攞水撲火，總之遲做好過冇做，唔使等人上街遊行！」詹瑞文亦加多把嘴：「輸晒！作用大唔大佢自己知，派錢唔係好適合方式，佢之前嘅決定太過男人，少咗啲女人心思！」

靚靚：慳番唔使

影后袁詠儀（靚靚）亦不平則鳴：「希望下次個財政預算案可以做得再全面啲，建議啲智囊團要深入研究基層有咩需要！派唔派錢6號都會去遊行，因為財政預算案唔係咁完善！我相信點都會有人去行，始終住屋冇解決過。（點用6千蚊？）喺曾俊華係咁諗6千蚊應該點派嘅時候，我都覺得佢可以慳番唔使，依家有咪當係一筆橫財！我會叫多啲朋友一齊做善事，有興趣可以搵我，我會將啲錢捐去幫助今次冇受惠嘅新移民家庭！」

至於謝安琪亦覺得今次是香港人的勝利：「我覺得今次係香港民意勝利，希望政府推出多啲政策解決民生問題！」而袁彌明則說：「我一早都話要回水o架啦！唔知曾俊華要面定係點，依家咪要畀啲錢市民！我會去遊行o架！因為仲有好多地方要改進嘛！」