Amanda S.蔡依林春夏美白

春天將至，圈中女星均以清新造型現身。不過春夏裝配搭重要，Amanda S.的白色連身裙被本地設計師郭慶彬大讚，是春夏裝必然之選，同樣穿白色低胸裙的Jessica C.則凸顯漂亮線條。

高分組

Amanda S.款式特別 (10分)

評語︰「着得好好睇，白色連身裙剪裁別致，款式特別，加埋白色高踭鞋，突出白色優雅，爽朗短髮令整個造型舒服順眼，所以畀滿分。」

Jessica C.凸顯線條 (7分)

評語︰「一條好有春意嘅白色裙，Deep V嘅設計盡顯佢性感身段，白色裙好襯佢女仔打扮，而且身形比例均勻，凸顯漂亮嘅線條。」

穩陣派

陳嘉容熱帶風情 (6分)

評語︰「一身打扮色彩鮮艷，充滿熱帶風情嘅連身裙，顏色好Sharp，但黑色貼身長Boot感覺奇怪，如襯番淺色高踭鞋，會有更多春夏色彩。」

劉璇少女味道 (6分)

評語︰「佢個造型OK，粉色嘅連身裙Cutting好有少女味道，加埋新潮嘅Mix & Match，冬天加夏天裝，襯黑色手袖同高踭鞋，有一種型格少女感覺，化較淡嘅妝會更順眼。」

Angelababy配飾粗獷 (6分)

評語︰「條裙剪裁款式唔易着得靚，就算Baby高瘦身材都未必好睇，而配搭失敗之處係重型頸鏈同粗獷手鐲，着唔出簡單乾淨感覺。」

蔡依林斜膊別致 (6分)

評語︰「斜膊裙打扮別致，而且身材均勻，比例又靚。不過襯對黑色釘石Strappy Shoes感覺太多嘢，如果換對白色或淺色鞋就會更順眼。」

失手派

楊秀惠褲長尷尬 (4分)

評語︰「藍色連身褲打扮好新鮮，但係身體比例麻麻哋，褲嘅長度有啲尷尬，因為上面露好多如鎖骨，個效果唔襯，如果着多件白褸加白色高踭鞋會感覺春天啲。」

林夏薇妝濃唔襯 (3分)

評語︰「低V米色吊帶裙，佢嘅身形着得一般，着唔出好有魅力嘅感覺，而且米色裙要襯淡妝，但佢化嘅係妝濃，加埋個頭飾，感覺好多嘢，欠缺清麗脫俗。」

李彩華感覺Over (4分)

評語︰「一身米色打扮唔靚，雖然有一陣陣嘅春意，但着唔出少女嘅味道，配埋亂糟糟頭髮同重型嘅鏈，感覺Over咗。」

（10分滿分）

設計師Profile

郭慶彬（Ricky Kwok）加入時裝界8年，以廣告形象指導為主要工作，曾任名模樂基兒和熊黛林的形象指導，並在銅鑼灣開設時裝店，主要售賣日本和英倫時裝。