娜姐窒林敏驄屎淫頭

向來喜歡玩人的林敏驄，在節目玩殘周秀娜！他不但當娜姐是人肉攬枕，還手多多把玩其胸前觸鬚，最後上載至微博回味，難怪她回敬：「推你個屎淫頭！」

數圈中「玩人唔使本」的藝人，林敏驄當仁不讓！他不但講笑窒人當食生菜，口多之餘亦手多多，貪玩性格不減當年。阿驄最近為亞視主持《智醒智勁四方城》，昨日邀請性感女神周秀娜（Chrissie）擔任嘉賓，甫見「目標」當然絕不放過，結果玩謝Chrissie！

當記者要求合照時，阿驄鬼鬼祟祟走到她的後面，突然從後攬其纖腰一抱入懷，當正「人肉攬枕」。見慣風浪的Chrissie也被偷襲嚇了一跳，即時用手(月爭)撐着他的心口，然後尷尬地合照。

「真係好突然」

對於被阿驄偷襲，Chrissie笑說：「我之前啲攬枕賣晒，送唔到畀阿驄，咪當係懲罰畀佢攬囉！其實我好鍾意佢o架！佢係真正金句王，如果佢作一隻《蘇格蘭場上的Chrissie》畀我就好喇！」問會否感到尷尬？她說：「唔會！不過真係好突然，佢要攬就畀佢過吓手癮、畀佢捽吓，反正捽唔到啲乜！」

不過訪問期間，阿驄在Chrissie身邊踱步而行，密謀諗計再玩，當見她的胸前有條長長的眼睫毛做裝飾，即時伸手拉着觸鬚，並愈拉愈上！Chrissie見狀即伸手阻擋。玩完後仍未夠喉，阿驄還於微博上載攬腰照炫耀一番，氣得Chrissie學他寫歪音留言：「推你個屎淫頭！」

只是鬧着玩

記者事後致電阿驄，對於被指過分熱情，他強調只是鬧着玩，問會否感到尷尬？他說：「唔怕！因為我都怕尷尬！（摸到重要部位？）佢心口有執毛！」隨即把電話拿給在旁的Chrissie，她笑說：「咪當玩吓囉！上嚟預咗，話唔定下次係我玩人呢！」