李思欣捱病「出嫁」狂嘔
無綫藝人李思欣參演的電視劇《Only You只有您》正在播出，提到最難忘的一場戲，她表示到西貢開工時病得「瘟瘟扽扽」：「我一早就病到嘔，仲要去西貢吹風，之後頂唔順去急症室，我嗰日着裙褂又面青口唇白，真係嚇親人！」
雖然已多次在劇中穿婚紗，但思欣仍很期待結婚，提起夢想婚禮更一輪嘴說：「我好鍾意歐陸式建築，最近見到日本沖繩有個白色教堂，好想去嗰度搞婚禮！（成日着婚紗冇晒感覺？）現實同拍戲唔同，到時對住老公仲會有Feel嘅！」她表示先要找到真命天子才想結婚，問到是否恨嫁？思欣說：「平常心！人生大事唔想求其，細個想30歲前結婚，但依家覺得冇所謂，希望35歲嫁得出啦！」
李思欣自認浪漫，希望可在教堂內出嫁。
李思欣難忘捱冷着裙褂到西貢拍劇，最終要入急症室求醫。