廖祉甯想搞夢幻棟篤笑

落選亞姐「Barbie姐」廖祉甯予人印象麻麻，金句多多，令人摸不着頭腦，早前她接受專訪時為金句解畫，不難發現她不是太無厘頭，只是不懂表達自己！

日前「Barbie姐」廖祉甯身穿比堅尼拍照，當日天氣寒冷，拍攝地點的地下亦很污糟，為令拍攝效果更佳，要她瞓地擺甫士，也沒有半句埋怨和扭擰，一點也不「難搞」，不像外間所說麻煩多多。

廖祉甯除予人感覺麻煩外，金句亦多，原來她有苦衷：「娛圈係娛樂大眾嘅地方，好多事都想以幽默一啲嘅方式去講、去回應。好似我參選亞姐嘅時候，記者見到我大髀上面有一撻撻嘅瘀痕，其實係我嗰排壓力太大，有啲嘢令我覺得好唔公平、好難受，但我又唔可以講出嚟，只好自己喺枱底搣大髀嚟控制情緒，等自己唔好衝動，但呢個事實，喺當時根本冇可能講出嚟，惟有諗啲自己以為好幽默嘅答案答咗佢，點知出嚟嘅效果，只有自己覺得幽默，其他人一啲都唔覺得好笑，呢樣嘢我會好好檢討。」

恨與黃子華合作

廖祉甯最近簽了新經理人公司，希望在娛樂圈好好發展，問到有甚麼目標，她笑說：「我知呢個目標離我好遠好遠，但我覺得人總要設一啲好遠嘅目標，先會有進步。我入娛樂圈嘅目標，係想舉行一場萬人空巷嘅棟篤笑，因為我好想做啲可以令觀眾開心嘅嘢。我一向都好喜歡許冠文同黃子華，若果有機會同佢哋合作，真係好開心同榮幸！」