Bosco戀情浮面晒杏福笑容

黃宗澤（Bosco）與胡杏兒的緋聞傳足六年，雖然一直沒有公開，但兩口子前日高調拍拖到銅鑼灣掃貨，縱使有「電燈膽」同行，仍無損甜蜜。

無綫花旦胡杏兒自05年與黃宗澤合作劇集《我的野蠻奶奶》撻着後，曾多次被拍得甜蜜遊街，但一直堅稱分屬好友。前晚8時許，戴帽及眼鏡的Bosco與素顏上陣的杏兒現身銅鑼灣京士頓街I.T掃貨，雖然女友人全程做「電燈膽」，但他們仍邊行邊密斟，杏兒試鞋時，Bosco全程傍實提供意見。約半小時後，Bosco拿着兩大袋戰利品離開，而兩手空空的杏兒貼身尾隨。甫見記者拍照，杏兒即面露尷尬微笑，並不時低頭遮掩「真面目」；反觀Bosco則展露勝利笑容。其後，三人再步行往附近的i.t血拚，未幾，杏兒即購下大袋戰利品，並笑笑口向記者揮手道別，Bosco則說：「我哋都走喇！」

「朋友幫吓眼」

昨日記者致電Bosco，他表示當日同行的女友人是其形象指導：「嚟緊好多宣傳要做，除咗要為草蜢個節目做嘉賓，又要宣傳電視劇《女拳》，之後又要上《勁歌》，加上之前喺內地幾個月，所以順便買衫換季。（同杏兒一齊做草蜢嘉賓？）唔係！我哋係朋友，幫吓眼啫！（公開戀情？）唔係！」

對於杏兒及Bosco戀情浮面，杏兒新劇拍檔謝天華笑說：「如果咁樣可以谷到宣傳，都不失為一件好事！」他指拍劇時甚少見Bosco探班，談到二人在內地拍劇兼拍拖「見到滯」，他笑說：「唔通喺內地拍完，返嚟唔拍咩！」而同劇的敖嘉年則大讚杏兒及Bosco襯到絕，但不認為此舉能刺激收視。

文、攝：追蹤組