千嬅勁踩：做到成個賊咁！

出爐「香港電影評論學會」影后楊千嬅昨日以大使身份出席《第35屆香港國際電影節》記者會，她表示不想與老公丁子高合作拍電影，免得鬧交兼影響感情。問到老公是否想演戲，她說：「肯定冇！睇吓佢個肚腩，邊有演員係咁o架！佢個樣係要做小生，但佢又係咁Chok。佢出道時拍過一部《飛虎》做警察，但佢做到成個賊咁！問佢做乜一跑就要掩耳，佢話要扮聽對講機。佢話導演唔畀佢講對白，自己仲走去加對白添！如果佢演戲我實笑爆佢。」

《單身男女》成為電影節開幕電影，導演杜琪峯表示一早已想找楊千嬅合作，他說：「佢比我想像中好好多，做得好自然。（千嬅有心理準備畀你鬧？）唔會，佢咁醒，好快就畀佢化咗啲嘢啦！」千嬅聞言後說：「即係話我賴皮呀？如果佢目標咗要鬧，你都閃唔到啦！」另一部開幕電影《香港四重奏II》中《上河圖》的演員詩雅和陳家樂亦是座上客，同場的導演關錦鵬被問到新片《他的國》是否由桂綸鎂取代范冰冰，他說：「我做事一向寫咗劇本先，得到批文先開拍，未定。」