樂基兒恨佗小天王人工受孕

近年屢傳有喜的樂基兒，前晚出席Dior派對時自爆，剛與老公黎明旅行享受日光浴！提到可有「努力造人」？她即流露出幸福到漏的表情，更轉口風不排除人工受孕！

現年30歲的名模樂基兒（Gaile），自2008年與黎明（Leon）在美國秘密註冊結婚後，多次傳出她為黎家繼後香燈，除了放下天橋事業外，更決心戒蒲狂做瑜伽等運動！雖然她婚後屢傳懷孕，每次卻中空寶！Gaile前晚以一身春日花裙打扮出席《"Dior Addict誘惑唇膏"-Be Iconic派對》，對於近日再傳有喜，她聞言即退後一步讓記者檢驗，證明身材冇變。

外遊曬日光浴

Gaile自爆上周才外遊回港，聖誕及農曆新年假期均在外國歡度，與Leon到一個熱帶地方曬日光浴，因此曬得一身古銅膚色。問到可有趁機努力造人？她即笑笑口避開話題：「唔知，冇諗過！可能係因為Holiday Season，去咗好多Dinner！」她表示暫時未有生育計劃，但將來若造人不成功，她坦言不排除接受人工受孕！其實去年她曾公開表示拒絕人工受孕，如今轉口風，似乎為生B不惜一切！對於陳慧琳早前亦承認人工受孕，Gaile說：「我覺得每人都有自己嘅選擇，最緊要係BB健康，我依家都未開始，遲啲試過唔得就一定要試！」

Gaile表示今年會多接一點工作，並說：「我依家呢個年紀，會選擇啱自己嘅工作，而且啱啱過咗新年，工作會開始多啲！（老公唔想你辛苦？）唔係！」提到Leon舊緋聞女友李嘉欣早前誕下小JM，Gaile表示已送了禮物給BB：「我恭喜咗佢，都有送禮物！（送乜？）秘密，好戥佢開心，見到佢佗住B嘅時候都好靚！（令你想加速生B？）唔會！」至於嘉欣昨日在微博上寫道：「M的手工藝。」並上載一張以囝囝英文名Jayden的貼紙，似乎坐月的她為BB房悉心粉飾，認真廿四孝！