知心好友天堂再會

蔡楓華人生跌宕起伏，到現在仍是「一支公」，沒有結婚，更曾落得兩袖清風！不過，他是一個感情澎湃的動物，提起「情」字，提起昔日一段鮮為人知的感情，他，唏噓無限！

記：想唔想結婚？

蔡：當然想，我欠阿媽太多，佢一直想我成家立室，奈何一直圓不到佢心願，依家冇拍拖，點結婚！

記：以前有冇試過接近結婚？

蔡：以前環境好，試過同新加坡數一數二嘅富豪千金拍拖。可惜唔係性格唔夾，而係我哋生活條件太大差異。當年佢嚟香港，已經帶佢去高級餐廳食飯消遣，但佢總係唔滿意，一定要包場清晒所有人，你話我哋點可以繼續呢？

記：會唔會搵番佢？

蔡：唔會！人哋結咗婚！冇可能！

記：年屆80歲嘅媽媽點睇你開演唱會？

蔡：佢話：「衰仔，賺多啲錢同買樓！」

記：欠媽媽咁多，係咪因為佢已經老喇？

蔡：佢知我發生乜事，冇怪過我，最好報答係自己爭氣，今次除咗阿媽，阿哥同家姐都會捧我場！之前大家好疏離！

記：當年競爭咁大，喺娛樂圈係咪好少朋友？

蔡：可能係呢個原因，當年我唱片公司，除咗我，全部都係女仔，包括林憶蓮、林志美、甄妮等！不過我都有交心朋友，好似梅艷芳、陳百強同張國榮，當年我哋一齊玩，一齊落Disco，可惜佢哋3個都走咗！

記：喺演唱會會唔會唱佢哋3個嘅歌？

蔡：可能會唱陳百強嘅《鼓舞》，因為呢首歌好令我感動！