蔡楓華重拾光輝脫霉

被人笑、被人奚落，對蔡楓華（Ken）來說絕不好受。因一句說話被打落十八層地獄，人生自此走入死蔭幽谷。幸蔡楓華打不死，在現今樂壇中，蔡楓華不再作壁上觀，他要重新裝備自己，拾回失去的東西，包括已逝去的剎那光輝、名譽及地位！

採：音樂組　文：專案組　攝：沈健程　場地：藍灣海景酒店

事業篇　等出頭

數數手指，蔡楓華已有11年沒有舉行個人演唱會，多得好友盧敏儀及孫敬安幫助，蔡楓華下月終於重返舞台，一股雄心壯志湧上心頭，誓要洗脫霉氣，不再「兜踎」！蔡：蔡楓華　記：記者

記：覺得入場嘅人會抱乜心態睇你演唱會？

蔡：（一臉自豪）咁多年一定有Die Hard粉絲，好多人都聽我嘅歌同買我嘅碟，前幾日聽個的士司機話一定會捧我場，真係開心！始終咁多年冇開，震撼力好大，自己都始料不及，人氣返晒嚟！今次喺Star Hall開兩場，人次加埋都算係中型演唱會！

記：怕唔怕唔記得歌詞？

蔡：唔會！以前嘅歌我都記得晒，不過今次會有新唱法！

記：搵老師學？

蔡：唔會，我識研究，慢歌一定冇問題，快歌一定唔得，因為我係舞林敗類。但公司會安排Dancer，同我嘅台風配合！

記：希望藉今次演唱會攞番啲乜？

蔡：（嘴角繃緊）要攞番失去嘅名譽同地位，失去咗好多年，我要一手攞番嚟！希望做埋今次演唱會，可以開世界巡迴，到澳紐、美加、內地見我嘅歌迷！

收拾心情突破自己

記：會唔會怕呢啲係泡沫？

蔡：唔會，總之有人Line-up，我就會做！

記：身心已經Ready？

蔡：我覺得反而要處理點樣收拾心情，去突破自己！

記：會唔會驚人哋想去睇發台瘟？

蔡：我自十幾歲喺台上唱歌，到今日從未失常，謠言止於智者，你哋嚟睇我演唱會啦，我好有信心！

記：開完第一場再加場？

蔡：我演唱會冇贊助，係一張一張實賣實買，有咁嘅成績唔係我誇口自己好，係成隊人嘅成果。

忘掉過去展望未來

記：之前嘅經濟情況點？

蔡：過去嘅嘢唔講，望前面啦！經濟會好好o架喇！

記：會唔會遲啲經濟好咗，有人追你錢？

蔡：從來冇借過人錢，收入都係自己賺嘅！

記：係唔係因為男人要有骨氣？

蔡：唔可以用骨氣嚟形容，而係堅強，當被人冷落時我都會諗，總有一日會出頭。試過有人叫我賺一啲可恥嘅收入，我都冇去做！

記：可恥嘅收入指咩？

蔡：（語氣堅決）唔講，總之我維持到生計。冇借人錢，只有人借我錢，我欠人人情就有，都唔知點還！

後記：留心演出報道

很久未見蔡楓華，訪問過後，大家都想集得這幀彌足珍貴的郵票，跟他拍個照。當時，電視正播出他有份演出的《勁歌金曲》，123笑……埋好位，他仍望住電視，未有對着鏡頭，再來123笑……蔡楓華仍望着自己唱《倩影》，一臉感觸！這張合照，最後一個望鏡，一個望電視，相當有趣。