春意盎然G.E.M.花樣少女

踏入初春，天氣乍暖還寒，不少貪靚女星已急不及待出動春裝。形象設計師Emily表示今年春季依然流行花花Pattern，但款式及剪裁非常五花八門，稍有不慎就會「花師奶」上身，她大讚春風滿面的G.E.M.穿得最青春逼人。

G.E.M.眼前一亮

「G.E.M.（鄧紫棋）條連身褲好靚，由於圖案係密集式，所以仔細睇先睇到大花花，款式好Young，好啱佢年紀，成熟不失少女味。」

林欣彤鄰家女孩

「林欣彤雖然仲係學生，但感覺極似鄰家女孩，暫時仲欠啲星味，其實佢細細粒唔應該着太多Layer。」

黃婉曼新年Look

「佢對腳本身靚，好適合着呢類型嘅裙，而且條紅色花花裙本身好靚，配合到新年氣氛，但外套就多咗，唔着會更青春。」

阿Sa比例唔啱

「阿Sa（蔡卓妍）件西裝褸過短，條褲過長，令身形比例古怪，而下身褲較鬆，似下身肥腫，整體帶Sporty Chic，但就唔應該配太Lady嘅Ankle Boot，應改綁帶款。」

傅穎日系少女

「佢依然走日系風格，所以冇咩驚喜，而條花花裙好少女，但對鞋就好Elegant，其實可以加少少民族首飾配襯。」

梁詠茵配搭出錯

「梁詠茵（前名梁郁霖、洪天明前女友）本身膊頭比較橫，唔應該着件毛毛外套，而橫間亦唔襯碎花，加上衫同裙物料都唔襯，顯得佢個人好腫。」

陳倩揚民族姑娘

「充滿民族色彩嘅繡花，感覺年輕，而且同白色毛毛背心都好夾，如果有飾物襯就最好。」

Profile

形象設計師Emily曾為著名模特兒及明星擔任形象顧問，最近為SK-II、Shiseido、LG及BioSlim廣告擔任形象指導。