新舊八模轟低裝
石詠莉大爆o靚模「飯局名單」，但前晚在活動中卻未見她與o靚模碰頭，更遭同場新舊八模圍剿。舊八模的Hailey C.寸石詠莉博見報：「點解同場都見唔到佢？我哋唔介意同佢合照o架！話唔定又有多個頭版出呢？」而拍檔Annie G.則指石詠莉「衰多口」：「原來佢喺度o架？做咩唔見佢嘅？不過如果係我講錯嘢或做錯嘢都要避人啦！佢咁樣做宣傳，係咪知道自己露條『事業線』已經冇晒宣傳功效，要靠其他人搵嘢嚟講呀？」
新八模的Suki則指石詠莉宣傳手法低裝：「都知佢要宣傳首歌，但宣傳手法有好多種，開字頭嚟影射人就比較低檔，一係開埋名，唔好等人估估吓，畀人冤枉去飯局好無辜。」連鄭欣宜亦打趣地問：「咩嚟o架？好有興趣八喎！不過就冇人問過我價。」
Suki（左起）、Annie G.、周秀娜和Hailey C.一同出席活動。