詩丹最強嘉亨絕配

圈中不少情侶及夫妻經常公開晒恩愛，肉麻當有趣！堪輿學家麥玲玲及陳子才均激讚甄子丹與汪詩詩是「最強夫婦」，許晉亨與李嘉欣則是「絕配夫妻」！

登對度:●●●●

甄子丹、汪詩詩

「宇宙最強」甄子丹雖然片約不絕，但仍經常抽空陪家人。與汪詩詩結婚多年的他，戀火依然熾熱，兩公婆於剛過去的情人節更歎龍蝦意粉慶祝。此外，子丹數月前已訂造逾百萬元鑽石錶贈愛妻，一個字「冧」！

麥玲玲：

子丹同詩詩生肖例沖，經常聚少離多，其中一方要遷就多啲，但係詩詩好有旺夫相！

陳子才：

子丹屬陰金、詩詩屬陰土，雖然生肖相沖，但詩詩旺夫兼順得人，性格上係Perfect！

登對度:●●●●

丁楊：和而不同

除了拍拖外遊及在微博傳情外，丁子高曾購買一張枱放於洗手間，方便千嬅如廁時上網，並於千嬅婚後首個生日送上365支睡蓮，細心又浪漫。

麥玲玲：

佢哋生肖例沖，其中一方要遷就，但千嬅婚後事業運強咗，可見老公旺妻。

陳子才：

丁子高屬陰土，千嬅屬陰木，命格上有共同語言及藝術才華，互相欣賞但又各有空間。而丁子高係「付出型」，會Lead住「接收型」嘅千嬅。

登對度:●●●

陳蔡：情人知己

陳偉霆及蔡卓妍（阿Sa）去年公開戀情，並於農曆新年蜜遊泰國預支蜜月，更互拍泳衣相放床頭。至於首個情人節，阿Sa冧爆收男友送上的99朵玫瑰，她則自製曲奇餅「回禮」。

麥玲玲：

佢兩個易有拗撬同波折，唔係咁睇好！

陳子才：

阿Sa屬陰土、陳偉霆屬陽木，命盤中陰土陽木相合，零舍黐得埋，非常啱傾！其實阿Sa比較缺乏安全感，要搵大樹倚靠，陳偉霆就係呢棵大樹！

登對度:●●●●●

李嘉欣、許晉亨

李嘉欣及許晉亨婚後一直恩愛，早前嘉欣更誕下「小JM」Jayden，一家三口樂也融融。冧功了得的嘉欣，除了親手織溫暖牌頸巾外，亦曾「重錘出擊」送名錶給老公！

麥玲玲：

一個屬虎，一個屬犬，BB就屬兔，「三合」好夾，完全冇問題！

陳子才：

許晉亨係陽木，嘉欣係陰金，最特別係兩人各自嘅夫妻宮都相合，絕對係好事。

登對度:●●●

藍男：心靈嚮導

王祖藍和李亞男去年爆出「長短腳之戀」，但「藍男」無懼流言蜚語，愈見愛得癡纏！亞男自爆新年到男友家拜會「未來奶奶」，又下廚煮西餐冧男友；祖藍則不時指點女友的廣東話。

麥玲玲：

佢哋屬於中等姻緣，都算平穩，但係喺2013年會有爭執。

陳子才：

王祖藍屬陰金，李亞男屬陰水，水要有土地先可以「定落嚟」，土亦要靠水先「郁動」。李亞男以前唔知自己想點，而祖藍就好識諗，所以好有安全感。

登對度:●●●●

梁劉：互補不足

梁朝偉及劉嘉玲相戀多年，雖然愛得相對低調，原來二人均有寫信習慣，嘉玲認為透過文字及筆迹傳情達意比SMS浪漫，日前他倆還外遊滑雪慶祝情人節。

麥玲玲：

一凹一凸冇問題，命格都好夾。

陳子才：

兩個都係屬陽火，屬性係太陽，即係雙方都好明白大家嘅嘢，佢哋適宜「小別勝新婚」。而偉仔性格較內斂，嘉玲主動熱情，可以互補不足。