謝夫布烈治蛀書蟲變獨眼龍

去年憑《聲聲相識》奪奧斯卡影帝的謝夫布烈治，今年再憑高安兄弟翻拍的西部片《離奇復仇事件》獨眼警長一角，提名奧斯卡影帝，他強調沒有受舊版影響，純靠睇書揣摩角色。

記：記者　謝：謝夫布烈治

記：你有冇睇過1969年版本嘅《獨眼龍雙槍殲四虎》？

謝：當然有啦！幾好睇呀！

記：揣摩角色時，有冇從男主角尊榮飾演嘅Rooster警長中攞靈感？

謝：由於《離》片係忠於原著拍，所以我係從書中人物描述探討演繹方式，冇從尊榮方面參考。

記：舊版獨眼龍嘅黑色眼套係戴喺左眼，你係咪為咗區分新舊先改戴右眼？

謝：其實唔係有心，只係戴右眼比較舒服，而且工作人員都覺得較為順眼。

記：自從1988年《大保齡離奇綁架案》後，今次再同導演高安兄弟合作，有咩感覺？

謝：我覺得好開心，佢哋兩兄弟好合拍！我好佩服佢哋，因為即使我有一個好喜歡嘅兄弟，但因為意見分歧太大，唔能夠想像點樣能夠合作，但高安兄弟對同一事物都有獨立思考，甚至持相反意見時都可以做到兩者並存，實在好難得！

穿越過去未來

記：當初高安兄弟喺你拍《創戰紀》時搵你，你有冇猶豫過係咪接拍？

謝：有呀！我好好奇點解佢哋兩個想翻拍69年嘅版本，不過伊凡高安解釋唔係翻拍舊版，而係忠於原著，仲叫我睇嗰本書，我睇完之後覺得故事同角色都好有趣，所以答應咗！

記：同時拍科幻片同西部片，有咩感覺？

謝：做演員嘅樂趣就喺呢度，因為我兩部片嘅化妝師都係同一個人，所以拍完《離》片一星期後要為《創》片補拍時，化妝師將我由風塵僕僕嘅粗獷警長，變為一塵不染嘅科幻人物，仲要將一百粒面部動作感應黑點放喺我塊面度，覺得好有趣！