圓來沒法擋

每當提起汪圓圓，總會跟她的家姐詩詩及姐夫「宇宙最強」扯上關係，也因這重關係，令她在事業與愛情兩方面都令人特別「關注」。事業上，殺入影壇的她能否在他倆的影子下輕易闖出名堂？愛情上，心中有「讚」的她又能否在他倆的倩影下教人另眼相看？

事業篇

跟很多人一樣，汪圓圓小時候很喜歡跟家姐汪詩詩在家中扮電影人物，尤其愛蓋上棉被扮古代英雄，最近她在星皓電影《大鬧天宮》終於一償所願，飾演彩雲仙子一角，過足「古裝戲癮」，對她來說，演戲絕不簡單：「有好多人演咗十幾年都仲要學，我好怕醜，拍戲時就好似變咗另一個我咁，日日都要接觸唔同嘅環境，有唔同嘅經歷同挑戰，好有滿足感！」但現階段未考慮拜師學藝，她笑言應該冇人敢收她做徒弟。

難忘跟發哥合作

圓圓的爸爸愛看電影，因此她從小就看遍中外電影，現在加入了電影圈，作為演員的她亦經常化身小粉絲：「最近拍戲有機會同周潤發合作，望住佢就好似發緊夢咁，之前一直都係喺螢光幕先見到佢，最鍾意睇佢扮賭神，傻咗不停食朱古力！」

每個演員都怕NG累事，她也不例外，每次NG都覺得不好意思，怕阻慢劇組進度，後來她終於免疫，不再怕NG：「拍電影個個都有出力，要學識唔怕NG，做得唔啱就重新再嚟過，最緊要最後大家都滿意成果。」

乖女想演壞女孩

有「模界乖乖女」之稱的圓圓，原來最想演壞女孩，最愛挑戰跟現實生活中不同的角色，她心目中的「壞女孩」形象就是荷里活性感女星安祖蓮娜祖莉，她亦學了多技傍身以防萬一：「細個我有學彈琴同畫畫，之前就學中國舞，其實好多嘢我都有試過，好似滑雪、踢波，平時就跑步練氣。」

早前在賀歲片《最強囍事》中，她要演一名「女強人」，跟她真實性格完全不同：「喺套戲度我要好惡，成日發脾氣，對我嚟講真係好有難度，所以我要逼自己諗啲好嬲好嬲嘅嘢！」

儲經驗開拓巿場

家姐汪詩詩近來成立了「Bullet Films Production Limited」，身為妹妹的圓圓，自然成為旗下藝人，除私人因素外，她亦希望開拓電影市場：「以後模特兒方面嘅工作一定會少咗，要騰出多啲時間喺拍戲度。」現時她會專注拍戲，希望儲夠「經驗值」去荷里活發展：「我十八歲去過洛杉磯試鏡，拍咗個廣告，對我嚟講，荷里活係一個Dream，雖然好遙遠，依家惟有逐步逐步嚟！」

親情篇:「宇宙最強」的哥哥

圓圓的姐夫是「宇宙最強」的甄子丹，雖然他們閉門一家親，但一涉及工作則「親戚都冇情講」，早前二人同場拍攝《大鬧天宮》，事前圓圓亦分外緊張：「拍之前有啲期待同姐夫拍戲會點，去到片場佢唔再係我姐夫，我見到佢另一面，對工作好嚴謹，咩都要完美，我盡量做到佢嘅要求，做唔到都好失望。」

不過工作後，甄子丹又回復「姐夫」的身份，會稱讚圓圓的表現，但他們私底下都甚少談及工作，這個姐夫對圓圓來說，亦擔當着「哥哥」的身份：「其實我細細個就好想要個哥哥，姐夫好關心我，我哋好多嘢都會傾，佢就好似我哥哥咁照顧我！」

外公逝世打擊沉重

家庭對圓圓來說一直都扮演着重要的角色，早前外公病重，她跟家姐汪詩詩馬上飛返洛杉磯陪伴外公：「公公有Cancer五年，都預咗佢會離開，不過呢次對我哋係個好大嘅打擊，好唔開心，但要明白人生就係咁。」

因為所有親戚都趕返洛杉磯探病，令家人有機會團聚，對她來說，亦是難得的時光：「雖然公公過咗身，但呢件事令我哋一家更加團結，我同屋企人都要更加珍惜共處嘅時光。」

愛情篇:真命天子有「緣」人

圓圓相信「緣分」，卻「緣來」真的沒法擋，愛情說來便來。秘密戀上「玩具大王」蔡志明細仔蔡加讚的圓圓，雖愛得低調，但燒得火熱自然就會曝光；為保護剛萌芽的情苗，她愛藏心底只管甜笑；不過，當話題觸及家姐與姐夫的浪漫愛情故事，雙眼卻即時閃出艷羨亮光，對「緣分」二字更是深信不疑：「當時佢哋兩個都冇乜特別去搵結婚對象，但係點知道識咗兩個禮拜就決定結婚。」

最初她從家姐口中得知婚事，更一度以為是講笑，因為當時她連未來姐夫一面都未見過：「佢哋結婚前我只係同姐夫通過電話，嗰次印象好好，因為我一聽就好鍾意姐夫把聲，覺得好舒服，覺得佢一定係個好男人！」

姨甥女「催生」BB

事實亦印證當時圓圓的第一感覺沒錯，汪詩詩跟甄子丹婚後美滿，更育有一子一女，對着兩個可愛的姨甥，圓圓頓時變了一個「小媽咪」，喜愛小朋友的她表示，將來一定會嘗試做媽媽滋味，但萬料不到她的姨甥比她的父母更早催促她生仔：「有次姨甥女同我講，話佢好想要個表弟妹，嗰刻估唔到小朋友都會畀到生仔壓力我！因為只有我可以畀到表弟或表妹佢！」

對新戀情她是秘而不宣，但談到作為伴侶的條件，她則毫不猶豫的說：「要愛我同埋我嘅屋企人；而且，一個男人有自己嘅事業都好重要，證明佢識得負責任。」在她心目中，拍拖是絕不能輕率，亦必須互相信任，她滿有期待的說：「我會好認真先會拍拖，會視男友為結婚對象。」