Winkie@HotCha失戀搵狗陪
女子跳舞組合HotCha成員Winkie，養了一頭名叫「囡囡」的九歲大八哥犬：「我全家都好鍾意狗，我讀小學六年班嗰陣，屋企隻迷你都柏文『排骨』走咗，全家都喊到變豬頭，所以買番『囡囡』返嚟！」她表示「囡囡」是父母的「掌上明珠」，皆因媽咪嫌她論盡，嚴禁她餵食物給愛犬，爸爸則經常親自餵生果給「囡囡」食，待牠如親女。
不過，愛錫「囡囡」的Winkie不會呷愛犬醋，並大讚牠有人性：「我失戀嗰陣喊，『囡囡』識氹我開心；佢有時做錯嘢，識好似人咁企起身罰企，平衡力好好！」鑑於「囡囡」屬高齡犬，故她擔心愛犬將「百年歸老」，更曾因此痛哭流涕，要家人安慰：「其實生老病死係必經階段，所以囡囡喺身邊嗰陣一定要善待佢！」
Winkie視「囡囡」為摯友，經常與牠傾訴心事。
「囡囡」自動自覺罰企，氹死主人。